Elimizde balalardyń 33,9% kúnine 2 jáne odan da kóp saǵatyn túrli qurylǵylar ekranynyń aldynda ótkizedi, dep habarlaidy QazAqparat.
Bul jaily búgin «Qazaqstandaǵy balalar semizdiginiń taralýyn zertteý» konferentsiiasynda QR Densaýlyq saqtaý ministrligi Qoǵamdyq densaýlyq saqtaý ulttyq ortalyǵynyń basqarma tóraǵasynyń mindetin atqarýshy Janar Qalmaqova málim etti.
«Zertteý nátijelerinen belgili bolǵandai, balalardyń 33,9% kún saiyn eki jáne odan da kóp saǵatyn túrli qurylǵylar ekranynyń aldynda ótkizedi. Bul kórsetkish qalalarda – 37,2 paiyzdy, aýyldarda – 30 paiyzdy qurap otyr. Osynyń saldarynan bala kóp qimyldamai, kóziniń kórý qabileti nasharlaidy. Sondyqtan balalardyń teledidar, telefon, kompiýter nemese planshetten túrli mýltfilm kórip, oiyn oinaýlaryn shekteý kerek», - dedi ol.
Janar Qalmaqovanyń dereginshe, elimizde oqýshylardyń 77,2 paiyzy mektepke jaiaý nemese velosipedpen barady. Kúnine 1 saǵat nemese odan da kóp ýaqyt fizikalyq belsendi balalardyń úlesi – 86,8 paiyz.
«Mektepterdiń 90,8 paiyzy balalarǵa sabaqtan tys ýaqytta bilim ordasynyń ashyq sporttyq alańdarynda oinaýǵa ruqsat bergen. Al ishtegi sport zalda sabaqtan tys ýaqytta oinaýǵa mektepterdiń 88,9 paiyzy múmkindik berip otyr», - dedi QR DSM Qoǵamdyq densaýlyq saqtaý ulttyq ortalyǵynyń basqarma tóraǵasynyń mindetin atqarýshy.
