- Qazaqstanda memlekettik menshikti ońtailandyrý 2 kezeńmen júrgiziledi.
Bul týraly búgin Úkimet otyrysynda QR Qarjy ministri Baqyt Sultanov málim etti, dep habarlaidy "Ult aqparat".
«Búgingi tańda memlekettik menshikte 7 myńǵa jýyq uiym jumys isteidi, olar - memlekettik kásiporyndar, aktsionerlik qoǵamdar, jaýapkershiligi shekteýli seriktestikter. Túgendeý jónindegi tapsyrmanyń aiasynda ákimderdiń orynbasarlaryn shaqyra otyryp jáne «Atameken» Ulttyq kásipkerler palatasynyń qatysýymen 16 oblys jáne 177 aýdan tyńdaldy. 6 751 uiymnyń ishinen ár nysan qaraldy. Sondai-aq 376 respýblikalyq menshik uiymy boiynsha 22 ministrlik pen vedomstvo baiandady», - dedi ol.
Ministrdiń atap ótýinshe, túgendeý nátijeleri boiynsha memlekettik menshikti ońtailandyrý 2 kezeńmen júrgiziledi. Aldymenen memlekettik menshik uiymdarynyń sany 1 myńnan asa uiymǵa nemese 16 paiyzǵa qysqarady. Ekinshi kezeńde taǵy 4 600-ge jýyq uiymǵa nemese bastapqy sanynan 65 paiyzǵa azaitý usynylady.
«Básekelestik ortaǵa berýden basqa ońtailandyrýdyń quraly retinde uiymdardy qaita qurý jáne jabý qolǵa alynady. Birinshi kezeńde uiymdar sany 1 136 kásiporynǵa qysqarady. Olardan: 408 uiym kestege engizilgen; 105 uiymdy kestege engizýdi usynamyz; 380 uiym qaita qurý jolymen qysqarady; 243 uiymdy taratý (joiý) usynylady. Sonymen, birinshi kezeńnen keiin memlekettik menshikte 6 myńnan az kásiporyn qalady.Qalǵan uiymdardyń negizgi bóligin balabaqshalar, kolledjder, aýrýhanalar quraidy. Olar básekelestik ortaǵa ekinshi kezeńde usynylady. Qazir ákimdiktermen ilki joba retinde 94 uiymdy keiinnen satyp alý quqyǵynsyz senimgerlik basqarýǵa berý kelisildi», - dedi Sultanov.
