«Qazaqstannyń turǵyn úi qurylys jinaq banki» AQ Ortalyq filialynyń direktory Jansultan Mataev áielderge arnalǵan ipoteka qashan iske qosylatynyn aitty, dep habarlaidy QazAqparat.
«Áielder ipotekasy» baǵdarlamasy osy jyldyń basynda iske qosylýy tiis bolatyn. Alaida, pandemiiaǵa balanysty keiinge shegerildi. Bul másele pysyqtalyp jatyr. Jaqyn arada ony jariia etemiz», - dedi ol Ortalyq kommýnikatsiialar qyzmetindegi baspasóz máslihatynda.
«Turǵyn úi qurylys jinaq banki» AQ basqarma tóraǵasynyń orynbasary Áliia Aidarbekova Qazaqstanda turǵyn úi salasynda genderlik teńdikti jetildirý maqsatynda áielderge arnalǵan ipoteka jobasy júzege asyrylatyndyǵyn aitqan edi.
«Turǵyn úi qurylys jinaq banki taǵy bir jobany iske qosty. Ony 2020 jyly júzege asyrýdy josparlap otyr. Bul «turǵyn úi qurylysyn qarjylandyrýda genderlik teńdikti qoldaý jónindegi joba» nemese «áielder ipotekasy» dep atalady. Jobany Aziia damý banki 38 milliard teńge kóleminde qarjylandyrady», - degen edi ol.
Áliia Aidarbekovanyń aitýynsha, áielderge nesieler bastapqy jáne qaitalama turǵyn úi satyp alýǵa beriledi. Nesieniń eń joǵary somasy 30 mln teńgeni quraidy. Ony alý úshin tabysy 200 myń teńgeden tómen bolsa, eń tómengi bastapqy jarna 15 paiyz mólsherinde bolady. Al tabysy 200 myń teńgeden asatyn áielder úshin bastapqy jarna - 20 paiyz. Paiyzdyq mólsherleme aldyn ala boljam boiynsha, 12 paiyz deńgeiinde bolady. Al «Turǵyn úi qurylys jinaq bankinde» aqsha jinaǵandar úshin stavka tómendep, 3,5-5 paiyzdy quraidy.
