Qazaqstanda turǵyn úi salasynda genderlik teńdikti jetildirý maqsatynda áielderge arnalǵan ipoteka jobasy júzege asyrylady. Bul týraly «Qazaqstannyń turǵyn úi qurylys jinaq banki» AQ basshylyǵy aitty, dep habarlaidy QazAqparat.
«Turǵyn úi qurylys jinaq banki taǵy bir jobany iske qosty. Ony 2020 jyly júzege asyrýdy josparlap otyr. Bul «turǵyn úi qurylysyn qarjylandyrýda genderlik teńdikti qoldaý jónindegi joba» nemese «áielder ipotekasy» dep atalady. Jobany Aziia damý banki 38 milliard teńge kóleminde qarjylandyrady», - dedi baspasóz máslihatynda «Turǵyn úi qurylys jinaq banki» AQ basqarma tóraǵasynyń orynbasary Áliia Aidarbekova.
Qazir Qazaqstanda 9,1 million áiel turady. Onyń ishinde 4,4 milliony jumys isteidi, olardyń jartysy óz otbasylaryn derbes qamtamasyz etedi. Bul rette áielder ortasha eseppen er adamǵa qaraǵanda úshten bir bólikke az jalaqy alady.
«Tabys deńgeiiniń tómendigi olardyń úi satyp alý úshin qol jetimdi nesie alýy er adamdarǵa qaraǵanda qiyn ekenin kórsetedi. Áielderge nesieler bastapqy jáne qosymsha turǵyn úi satyp alýǵa beriledi. Nesieniń eń joǵary somasy 30 mln teńgeni quraidy. Ony alý úshin tabysy 200 myń teńgeden tómen bolsa, 15% mólsherinde eń tómengi bastapqy jarna, al tabysy 200 myń teńgeden asatyn adamdar úshin 20% bastapqy jarna jetkilikti», – dep túsindirdi Áliia Aidarbekova.
Onyń aitýynsha, paiyzdyq mólsherleme aldyn ala boljam boiynsha 12% deńgeiinde bolady.
«Nesieniń paiyzdyq mólsherlemesi aldyn ala boljam boiynsha 12% deńgeiinde bolady. Aldymen 50%-ǵa deiin aqsha jinaý qajet. Bizben birge aqsha jinaǵan adamnyń keiin stavkasy tómendep 3,5% - 5%-dy quraityn bolady. Biz qańtar aiynda alǵashqy 7 mlrd teńgeni alýdy josparlap otyrmyz. Aziia Damý Bankiniń jalǵyz sharty bar. Ipotekalyq nesieniń 40%-yn iri qalalarǵa, al 60%-yn aimaqtarǵa bereý kerek degen shart qoidy. Sondyqtan bul baǵdarlama, eń aldymen, aimaqtarda bastalady. Olar bizdiń salymshylarymyz bolýy kerek», - dep tolyqtyrdy Liazzat Ibragimova.
