Foto: Pexels.com
Ishki ister ministrliginde Qoǵamdyq keńestiń kezekti otyrysy ótip, onda quqyqtyq tártip pen qaýipsizdikti qamtamasyz etý baǵytyndaǵy jumystardyń qorytyndysy qaraldy, dep habarlaidy Ult.kz.
Ministr Erjan Sadenov qoǵamdyq keńes múshelerine elimizdegi kriminogendik jaǵdai týraly baiandady. Onyń aitýynsha, sońǵy jyldary qylmys deńgeii aitarlyqtai tómendegen.
"Qylmys deńgeii 11%-ǵa azaidy. 2023 jylmen salystyrǵanda 12 700 qylmysqa az tirkeldi. Eger 1990 jyldardaǵy jaǵdaidy qarasaq, ol kezde qylmys sany 200 myńnan asatyn. Qazir bul kórsetkish 102 myńǵa deiin tómendedi. Biz munymen toqtap qalmaimyz, nóldik mejege jetýdi kózdeimiz", – dedi ministr.
🔹 Aýyr qylmystardyń tómendeýi:
- 1997 jyly adam óltirý boiynsha 2594 fakt tirkelse, 2024 jyly bul kórsetkish 565-ke deiin azaidy.
- Atys qarýymen jasalǵan qylmystar sany 1,5 myńnan 118-ge deiin qysqardy.
🔹 Toptasyp jasalǵan qylmystar:
1992 jyly 18 928 qylmys tirkelse, bul kórsetkish 2024 jyly 5588-ge deiin tómendedi, iaǵni 4,5 esege azaidy.
🔹 Jańa qaýipter – zamanaýi tehnologiialarǵa beiimdelý:
Erjan Sadenov qylmys túrleriniń ózgerip, alaiaqtyqtyń keń taralǵanyn aitty. Bul qylmystardyń 42%-yn quraidy. Ministr alaiaqtyqtyń negizgi sebepterin qarjylyq saýattylyqtyń tómendigi men politsiiaǵa kesh júginýmen bailanystyrdy.
"Ministrlik halyqtyń kiberqylmystar týraly habardarlyǵyn arttyrý jáne aldyn alý sharalaryn kúsheitý boiynsha belsendi jumys isteýde", – dedi Sadenov.
Qoǵamdyq keńestiń úsh jyldyq qyzmeti de talqylandy. Keńes músheleri ishki ister organdarynyń qyzmetin jaqsartý úshin mańyzdy usynystar engizgenin atap ótti.
Ishki ister organdary men azamattyq qoǵam arasyndaǵy yntymaqtastyq quqyq tártibin nyǵaitýda mańyzdy ról atqarady. Bul baǵyttaǵy jumys odan ári jalǵasyn tabady.
