Qazaqstanda keibir preparattardy meditsinalyq emes maqsatta paidalaný aitarlyqtai ósti. Iaǵni sintetikalyq esirtkiniń áserin kúsheitý úshin satyp alynady. Bul týraly Májilistiń jalpy otyrysynda tiisti zań jobasyn talqylaý kezinde depýtat Snejanna Imasheva aitty, dep habarlaidy "Ult aqparat" Kazinform saityna silteme jasap.
«Atap aitqanda, «tramadol», «tropikamid», «azottyń totyǵy», «somnol», «pregabalin» jáne taǵy sol siiaqty meditsina preparattaryn jastar kóp paidalanyp jatyr. Bul zattardy esirtkige táýeldi adamdar sintetikalyq esirtkiniń áserin kúsheitý úshin paidalanady. Nátijesinde olarǵa meditsinalyq emes suranys aitarlyqtai ósti. Máselen, tropikamid kóz tamshylaryn nashaqorlar murynǵa tamyzady nemese kóktamyrǵa jiberedi. Osydan galiýtsinogendik áser alady nemese sintetikalyq esirtkiniń áserin kúsheitedi», - dedi S. Imasheva.
Onyń aitýynsha, qazir osy dárilik zattardy retseptsiz bergeni jáne olarmen jumys isteý qaǵidalaryn buzǵany úshin tek ákimshilik jaýaptylyq qarastyrylǵan.
«Bul jaǵdai osy preparattardy meditsinalyq emes maqsatta satatyn qaskóilerge tosqaýyl bola almai tur. Mysaly, 2022 jyly búkil elge tanymal, farmatsevtikalyq bilimi joq Tramadol Koroli (N. Karpov) kúshti áser etetin zattardyń iri partiiasymen birneshe ret ustaldy. Biraq, onda dárihana qyzmetine formaldy túrde litsenziiasy bolǵandyqtan, kúshti áser etetin meditsinalyq preparattardy zańsyz taratqany úshin ákimshilik aiyppul tólep qutylyp ketti. Sondyqtan, jobada atalǵan meditsinalyq preparattar quramy bar kúshti áser etetin zattardyń zańsyz ainalymy, olarmen jumys isteý qaǵidalaryn buzǵany, sondai-aq olardy urlaǵany úshin qylmystyq jaýaptylyqty engizý usynylyp otyr», - dedi depýtat.
