Astanadaǵy «Qazaqstan» jeńil atletikalyq sport kesheninde Qazaqstannyń ulttyq komandasyn V Aziia Para oiyndary — Aichi–Nagoia 2026 jarystaryna shyǵaryp salýǵa arnalǵan saltanatty rásim ótti, dep habarlaidy ult.kz QR Týrizm jáne sport ministrligini silteme jasap.
Bairaqty báseke 18–24 qazan aralyǵynda Japoniianyń Aichi prefektýrasy men Nagoia qalasynda ótedi.
Saltanatty sharaǵa Qazaqstan Respýblikasynyń Týrizm jáne sport ministri Erbol Myrzabosynov, Ulttyq paralimpiada komitetiniń ókilderi, sport ardagerleri, jattyqtyrýshylar, qoǵam qairatkerleri jáne basqa da qurmetti qonaqtar qatysty.
Sharanyń shymyldyǵyn Týrizm jáne sport ministri Erbol Myrzabosynov ashyp, ulttyq qurama sportshylaryna aldaǵy jarysta sáttilik tiledi.
«V Aziia Para oiyndarynyń bastalýyna sanaýly kúnder qaldy. Búginde elimizdiń sportshylaryna memleket tarapynan jan-jaqty qoldaý kórsetilip, jarysqa tyńǵylyqty daiyndalýyna barlyq jaǵdai jasaldy. Biyl 12 sport túrinen sportshylarymyz 23 oqý-jattyǵý jiynyn ótkizip, 22 halyqaralyq týrnirge qatysty. Osy jarystardyń nátijesinde 63 medal jeńip aldy. Bul – sportshylarymyzdyń tynymsyz eńbegi men júieli daiyndyǵynyń nátijesi. Sportshylardyń joǵary nátijelerge qol jetkizýi úshin sapaly daiyndyqpen qatar, qajetti áleýmettik qoldaýdy qamtamasyz etý de asa mańyzdy. Osy baǵytta Qazaqstanda zańnamalyq deńgeide I toptaǵy múgedektigi bar sportshylardy súiemeldeitin tulǵalardyń mártebesi bekitildi. Bul qoldaý sharalaryn júzege asyrýǵa 2025–2027 jyldarǵa jalpy 1,5 milliard teńge qarastyrylǵan. Aldaǵy Aziia Para oiyndaryna ulttyq quramamen birge 38 erip júrýshi attanady. Bul sportshylarymyzdyń jarystarǵa tolyqqandy qatysýyna jáne óz múmkindikterin barynsha kórsetýine jaǵdai jasaidy. Aldaǵy oiyndarda barsha sportshylarymyzǵa sáttilik tileimin! Elimizdiń kók týyn biikte jelbiretip, Otanymyzdyń namysyn abyroimen qorǵaityndaryńyzǵa senemin. Árbir jeńis – el úshin úlken maqtanysh!» — dep atap ótti Erbol Myrzabosynov.
Saltanatty rásimniń mańyzdy sátteriniń biri — Qazaqstan Respýblikasynyń Memlekettik týyn ulttyq quramanyń tý ustaýshylaryna tabystaý boldy. Oiyndardyń ashylý saltanatynda Memlekettik týdy alyp shyǵý qurmetine Parij-2024 Paralimpiadasynyń qola júldegeri, para jeńil atletikadan álem chempiony Dastan Muqashbekov pen para dziýdodan Álem chempionatynyń birneshe dúrkin júldegeri Aiala ie boldy.
Ulttyq qurama sportshylarynyń atynan Dastan Muqashbekov saltanatty ant berdi.
«Qazaqstannyń Memlekettik týyn Aziia Para oiyndarynda alyp shyǵý — men úshin úlken mártebe. Elimizdiń kórsetken erekshe senimin baǵalap jáne ózimniń jaýapkershiligimdi sezine otyryp, Aziia Para oiyndarynda elimizdiń namysyn laiyqty qorǵap, joǵary nátijege jetý úshin ózimniń jeńiske degen bar kúsh-jigerimdi jumsaimyn», — dedi qurama tý ustaýshysy.
V Aziia Para oiyndary — Aichi–Nagoia 2026 jarystarynda Qazaqstan atynan 12 sport túrinen 150 sportshy baq synaidy. Olar para jeńil atletika, para dziýdo, para ústel tennisi, para sadaq atý, para oq atý, para velosport, voleiboldy otyryp oinaý, para taekvondo, para júzý, para paýerlifting, bochcha jáne arbadaǵy tennis boiynsha óner kórsetedi.
Oǵan qosa, saltanatty shara barysynda Qazaqstannyń ulttyq paralimpiadalyq komandasynyń alǵashqy resmi maskoty — «Jeńistiń» tanystyrylymy ótti. Ol Qazaqstannyń Qyzyl kitabyna engizilgen qaraqal — dala sileýsini beinesinde jasalǵan. Maskottyń basty ereksheligi — bir aiaǵyndaǵy sporttyq protezi. Ol adam rýhynyń kúshin, qaisarlyq pen sheksiz múmkindikterdi beineleidi.
Qazaqstandyq parasportshylardyń alǵashqy resmi maskoty — «Jeńis» Vietjet Qazaqstan kompaniiasynyń qoldaýymen ulttyq quramaǵa tabystaldy. Kompaniia bul bastama arqyly aldaǵy bairaqty doda qarsańynda sportshylarǵa qoldaý kórsetip, olardyń jeńiske degen jigerin arttyrýdy kózdedi. Jenis oiyndar barysynda sportshylarǵa serik bolyp, komandalyq rýhty nyǵaityp, qazaqstandyq para sportshylardyń jetistikterin keńinen nasihattaýǵa yqpal etetin bolady.
Aita keteiik, V Aziia Para oiyndarynyń ashylý saltanaty 2026 jylǵy 18 qazanda ótedi. Jarysqa Aziianyń 45 eli men óńirinen shamamen 4000-ǵa jýyq sportshy qatysady.
Oiyndar aiasynda sporttyń 18 túrinen jarystar ótip, 502 medaldar jiyntyǵy sarapqa salynady.
