Qazaqstanda alkogol ónimderi men temeki aktsizi aitarlyqtai ósedi. Ony kelesi jyldan bastap 2019 jylǵa deiin kezeń-kezeńimen kóterý josparlanyp otyr. Ishimdiktiń 1 litri úshin aktsiz mólsheri 85 paiyzǵa, temekiniń 1000 danasy úshin 74%-ǵa deiin ósedi. Bul týraly búgin úkimet otyrysynda QR Ulttyq ekonomika ministri Qýandyq Bishimbaev málim etti, dep habarlaidy Baq.kz tilshisi.
«Alkogol jáne temeki ónimderine aktsizderdiń fiskaldyq fýnktsiiasyn kúsheitý maqsatynda aktsizdi satylap ulǵaitý usynylyp otyr. Qoldanystaǵy salyq kodeksinde aktsiz mólsheri 2014-2016 jyldarǵa belgilengen. Al 2017-2019 jyldarǵa aktsiz mólsheri anyqtalmaǵan», - dedi Q.Bishimbaev.
Sonymen, 2017 jyly algokoldik ónimniń 1 litri úshin aktsiz mólsheri 2000 teńge kóleminde belgilenbek. 2019 jyly salyq 2550 teńgege deiin ósedi. Osylaisha, qazirgi ýaqyttaǵy aktsizben salystyrǵanda 85 paiyzǵa artady.
«Syra jáne syra sýsyndarynyń 1 litri úshin aktsiz 2017 jyly – 39 teńge, 2019 jyly – 57 teńgege deiin ulǵaiady. 2016 jylmen salystyrǵanda ósim 219%-dy quraidy», - dedi Q.Bishimbaev.
Al temeki ónimderiniń 1000 danasy úshin 2017 jyly 6200 teńge, 2019 jyly 8700 teńge mólsherinde salyq salynady. Búgingi kúnmen salystarǵanda aktsiz ósimi 74% bolady.
«Alkogol ónimderin eksporttaý kezinde qosarlanǵan salyq salýdy boldyrmaý jáne otandyq óndirýshilerdiń básekege qabilettiligin kúsheitý maqsatynda alkogol ónimderin óndirý úshin óndiriste paidalanylatyn etil spirti aktsiziniń nóldik mólsherlemesin belgileý usynylady. Resei men Belarýste de osylai bosatylady», - dedi ministr.
Aita keteiik, úkimette «Qazaqstan Respýblikasynyń keibir zańnamalyq aktilerine salyq salý jáne kedendik ákimshilendirý máseleleri boiynsha ózgerister men tolyqtyrýlar engizý týraly» jańa zań jobasy talqylanyp jatyr. Zań jobasynda 234 túzetý kózdelgen, olardyń ishinde salyqtyq ákimshilendirý boiynsha – 207, salyq saiasaty boiynsha – 27.
.jpeg)