Búgin Nur-Sultan qalasyndaǵy Kásipodaqtar úiinde Qazaqstan Respýblikasy Kásipodaqtar federatsiiasy men «Qarashyǵanaq Petroliým Opereiting B.V» (QPO) konsortsiýmy arasynda yntymaqtastyq jáne ózara árekettestik týraly korporativtik-áleýmettik kelisim bekitildi. Bul jóninde federatsiianyń baspasóz qyzmetine silteme jasap QazAqparat habarlaidy.
Qujatqa QRKF tóraǵasynyń mindetin atqarýshy Satybaldy Dáýletalin men «Qarashyǵanaq Petroliým Opereiting B.V» konsortsiýmynyń bas direktory Edvin Blom qol qoidy.
QR Kásipodaqtar federatsiiasynyń basshysy atap ótkendei, bul táýelsiz Qazaqstan tarihyndaǵy tuńǵysh korporativtik-áleýmettik kelisim. Qujat iri kompaniia men respýblikalyq kásipodaq birlestigi arasyndaǵy áleýmettik áriptestikti damytýdaǵy negiz qujat bolmaq.
«Biz korporativtik áleýmettik jaýapkershilikti jumysshylardyń eńbek quqyǵyn qorǵaýdyń taǵy bir quraly dep esepteimiz. Búgin qol qoiylǵan kelisim elimizdegi áleýmettik-eńbek qatynastaryn damytýda aiyryqsha mańyzǵa ie jáne biz biznestiń korporativtik áleýmettik jaýapkershilik qaǵidattaryn júzege asyrýǵa degen talpynystaryn árqashan qoldaimyz. Bul kelisim áleýmettik-eńbek salasyndaǵy qarym-qatynastardy nyǵaitýda, salalyq kelisimder men ujymdyq sharttardy damytýda jańa múmkindik bolmaq», - dep atap ótti Satybaldy Dáýletalin.
Sonymen qatar, ol osy kelisimge qol qoiýǵa bastamashy bolǵan QRKF burynǵy tóraǵasy Eraly Toǵjanovqa erekshe rizashylyǵyn bildirdi.
Satybaldy Dáýletalin sonymen qatar, Edvin Blomǵa Kásipodaqtar federatsiiasynyń bastamasyna qoldaý bildirgeni úshin jáne korporativtik áleýmettik jaýapkershilik ideologiiasyn damytýǵa qosyp jatqan úlesi úshin alǵysyn jetkizip, QPO bekitken ujymdyq kelisimniń tiimdiligin atap ótti.
«Onda eńbekaqyny indeksatsiialaý, densaýlyǵyna bailanysty ýaqytsha eńbekke jaramsyz kezinde tólenetin aqyny kóbeitilgen kólemde berý, kópbalaly otbasylaryna materialdyq kómek kórsetý, shipajaida saýyqtyrýdy tóleý, jumys berýshiniń qabyldaityn jergilikti aktilerin kásipodaq uiymdarymen qabyldaý jáne ózge de máselelerdi kelisip sheshý qarastyrylǵan. Osyndai áleýmettik áriptester kóp bolsa eken. Bul kelisim basqa da iri jumys berýshilerdi QRKF bastamasyn qoldaýǵa jáne jańa korporativtik áleýmettik kelisimderge qol qoiýǵa jáne óz jumysshylary úshin burynǵydan da laiyqty jaǵdai jasaýǵa yntalandyrady»,-deidi Satybaldy Dáýletalin.
QPO Bas direktory Edvin Blom óz kezeginde QR Kásipodaqtar federatsiiasyna rizashylyǵyn bildirdi.
«Bizdiń QPO korporativtik kelisim jasaýda alǵashqy kompaniia retinde tańdalyp alynýy men úshin úlken mártebe. Bizdiń kompaniia uzaq jyldar boiy QPO-nyń 4 myń jumysshysy men kompaniianyń merdigerlik uiymdaryndaǵy 15 myń jumysshynyń múddelerin qorǵaityn úsh kásipodaq uiymymen birge jumys istep keledi. QPO men atalǵan kásipodaq uiymdary arasynda bekitilgen ujymdyq shart biyl Qazaqstan boiynsha eń úzdik sharttardyń biri dep tanylǵany kezdeisoq emes», - dedi Edvin Blom.
Onyń aitýynsha, QPO kadrlardyń arasynda qazaqstandyqtardyń úlesin kóbeitýge erekshe kóńil bólip otyr. Búgingi kúni kompaniia osy baǵyttaǵy tórtinshi baǵdarlamasyn júzege asyrýda. Onyń aiasynda injenerlik jáne kásibi pozitsiialardaǵy jergilikti kadrlardyń úlesi - 69 paiyz, al basqarýshy quramnyń úlesi - 76 paiyzǵa jetken.
QPO qazaqstandyq jumysshylardyń kásibi biliktiligin arttyrý maqsatynda arnaiy treningter ótkizip turady. Qazirdiń ózinde buǵan 225 million AQSh dollary jumsalǵan.
«Atalǵan kelisimge qol qoiý bizdiń kompaniia jumysshylarynyń áleýmettik jaǵdaiyn jaqsartýǵa úles qosady degen senimdemin. Bul bizge ujymdyq kelisimniń kómegimen biznesti ári qarai qalai júrgizý kerek degen máselede ortaq kelisimge kelýge múmkindik beredi. Biz QRKF jáne ózimizdiń úsh kásipodaq uiymdarymen áleýmettik áriptestikti odan ári jaqsartýdaǵy jumysymyzdy jalǵastyramyz. Bul jumys Qazaqstannyń bolashaq urpaǵy úshin turaqty mura qaldyrýǵa baǵyttalǵan ortaq maqsatqa negizdeledi», - dep sózin qorytyndylady QPO Bas direktory Edvin Blom.
Korporativtik áleýmettik kelisim iri kompaniia men respýblikalyq kásipodaq birlestigi arasyndaǵy áleýmettik áriptestikti damytýdaǵy negizgi qujat.
Yntymaqtastyq aiasynda taraptar jumysshylardyń áleýmettik-eńbek qatynastaryn saqtaý men qorǵaý, laiyqty eńbek jaǵdaiyn jasaý, eńbekti qorǵaý, densaýlyq jáne ekologiialyq qaýipsizdikti qamtamasyz etý salasynda árekettestikti nyǵaitpaq.
Yntymaqtastyqtyń basym baǵyttarynyń qatarynda eńbek janjaldarynyń aldyn alý men boldyrmaý jáne qoǵamda áleýmettik turaqtylyqty saqtaý bar.
