Foto: ashyq derekkóz
Qazaqstanda mektepterdegi alǵashqy áskeri daiyndyq baǵdarlamasy qaita qaralyp jatyr. Bul týraly Ortalyq kommýnikatsiialar qyzmetinde ótken brifing barysynda Qorǵanys ministrliginiń Áskeri bilim jáne ǵylym departamentiniń bastyǵy Murat Oljabaev habarlady.
Vedomstvo ókiliniń aitýynsha, qazirgi tańda bul pánge bólinetin ýaqyt jetkiliksiz. Osyǵan orai Qorǵanys ministrligi men Oqý-aǵartý ministrligi birlesip, pán saǵattaryn kóbeitip, patriottyq tárbiege baǵyttalǵan is-sharalardyń sanyn arttyrýdy josparlap otyr.
"Mektepterde alǵashqy áskeri daiyndyqqa óte az ýaqyt bólinedi. Bizdiń ministrlik oqý-aǵartý ministrligimen birlesip jańa baǵdarlamany qarastyryp jatyr", – dedi ol.
Jańa baǵdarlama aiasynda oqýshylardyń áskeri-patriottyq rýhyn nyǵaitýǵa baǵyttalǵan qosymsha sabaqtar men is-sharalar engizilmek. Bul bastama jastardyń el qorǵaýǵa degen qyzyǵýshylyǵyn arttyryp, azamattyq jaýapkershiligin kúsheitýdi maqsat etedi.
