Qazaqstanda áleýmettik qyzmetkerlerdiń ailyǵy men mártebesin arttyrý kózdelýde. Bul týraly Eńbek jáne halyqty áleýmettik qorǵaý vitse- ministri Erlan Áýkenov málim etti, dep habarlaidy QazAqparat.
«Búgingi tańda «áleýmettik qyzmetker» uǵymynyń biryńǵai túsindirmesi joq. Sondyqtan áleýmettik qyzmet salasynyń mamandary san-salaly sektorǵa jaýapty bolyp kórinýi múmkin. Osyǵan bailanysty barlyq vedomstvo úshin biryńǵai kvalifikatsiialyq talaptar men erejelerdi bekitýdi josparlap otyrmyz. Osylaisha, «áleýmettik qyzmet», «áleýmettik qyzmetker» uǵymdarynyń maǵynasyn aiqyndap, olardyń mártebesi men ailyǵyn arttyrý kerek», - dedi Erlan Áýkenov «Balalyq shaqty qorǵaý júiesiniń tiimdiligi jáne balanyń ál-aýqaty: memleket pen azamattyq qoǵamnyń birigýi» taqyrybynda ótken baspasóz máslihatynda.
Onyń aitýynsha, qazirgi ýaqytta pilottyq rejimde áleýmettik qyzmetkerlerdi testileýden ótkizý jóninde IýNISEF-pen birge birlesken joba júzege asyrylyp jatyr. Test áleýmettik qyzmetkerlerdiń kóńil-kúiin bilýge, ekinshi jaǵynan olardyń jumysty laiyqty atqara alatynyn, zańnama men Ádep kodeksin qanshalyqty biletinin anyqtaýǵa baǵyttalǵan.
Erlan Áýkenov áleýmettik qyzmet jumysynyń mártebesin arttyrý arqyly osy saladaǵy mamandardyń sapaly quramy jasaqtalatynyna senimdi. Al olardyń ailyǵy artsa, áleýmettik qyzmetkerlerdiń jalaqysy bilim nemese densaýlyq saqtaý salasyndaǵy áriptesteriniń aqshasymen teńesedi. Dál qazir olar atalǵan saladaǵy áriptesterinen eki ese az ailyq alady.
