Qazaqstanda áleýmettik kásipkerlik sýbektileriniń reestrin qurý josparlanýda. Bul týraly Májiliste Áleýmettik kásipkerlik máseleleri jónindegi zań jobasyn talqylaýda aityldy, dep habarlaidy QazAqparat.
«Qazaqstan Respýblikasynyń keibir zańnamalyq aktilerine áleýmettik kásipkerlikti damytý máseleleri boiynsha ózgerister men tolyqtyrýlar engizý týraly» Zań jobasy birinshi oqylymda maquldady.
Májilis depýtaty Ekaterina Smyshliaevanyń aitýynsha, zań jobasynda alǵash ret qyzmeti qoǵamnyń áleýmettik máselelerin sheshýge baǵyttalǵan kásipkerlik sýbektilerine anyqtama berilgen.
«Zań jobasyna sáikes, kásipker mártebesin alý úshin tómendegi sharttardyń kem degende bireýin oryndaýy kerek:
- azamattardyń áleýmettik osal sanattary úshin qyzmetkerlerdiń jalpy sanynyń keminde 50%-yn quraityn sapaly jumys oryndaryn qurý;
-halyqtyń áleýmettik osal toptaryna arnalǵan taýarlardy óndirý, olardy ótkizýden túsetin tabys kásiporynnyń jalpy tabysynyń keminde 50%-yn quraýy tiis;
- áleýmettik qyzmet kórsetý, densaýlyq saqtaý, bilim berý jáne tárbie, mádeniet jáne sport salalarynda qyzmet kórsetý», - dedi Májilistiń jalpy otyrysynda Ekaterina Smyshliaeva.
Zań jobasynda halyqtyń áleýmettik osal toptarynyń salalyq tizbesi aiqyndalǵan, oǵan barlyq toptaǵy múgedekter, kóp balaly jáne tolyq emes otbasylardan shyqqan jumysqa qabiletti azamattar, múgedek balany tárbielep otyrǵan ata-analar, bas bostandyǵynan aiyrý oryndarynan bosatylǵan, himiialyq táýeldilikterden emdelgen azamattar, zeinet jáne zeinet aldyndaǵy jastaǵy adamdar jáne basqalar kiredi.
«Zań jobasynda kásipkerlik sýbektisiniń jáne osyndai uiymdarmen ózara is-qimyl jónindegi ýákiletti organdardyń mártebesin aiqyndaý tártibi qarastyrylǵan. Osylaisha, áleýmettik kásipkerlik sýbektileriniń tizilimin qurý kózdelip otyr, tizilimge ený zańdylyǵyn óńirlik komissiia aiqyndaidy, al Ulttyq ekonomika ministrligi tizilimge ákimshilik etedi», - deidi depýtat.
Zań jobasynda áleýmettik kásipkerlikti memlekettik qoldaýdyń naqty sharalary qarastyrylǵan. Ony júzege asyrý boiynsha quzyretter jergilikti atqarýshy organdarǵa jáne memlekettik damý institýttaryna beriledi.
«Memlekettik qoldaý sharalary infraqurylymdy qamtamasyz etýdi, granttyq qarjylandyrýdy, kreditter boiynsha mólsherlemelerdi sýbsidiialaýdy, múliktik qoldaýdy, salyqtyq jeńildikterdi, oqytýdy, aqparattyq súiemeldeýdi, iskerlik áriptesterdi izdeýge járdemdesýdi jáne akseleratsiialyq baǵdarlamalar arqyly damytýdy kózdeidi», - dep túiindedi depýtat.
