Foto: aikyn.kz
Kólik ministrligi aqyly joldardyń tarifin kóterýdi josparlap otyr. Bul týraly vedomstvo basshysy Marat Qarabaev málimdedi, dep habarlaidy «Ult aqparat» Sputnik Qazaqstanǵa silteme jasap.
"Tarifti ulǵaitý josparda bar. Nege ekenin túsindireiin. Tarif 2013 jyldan beri on bir jyl boiy ózgergen joq. Byltyr 20%-ke kóterildi. Sosyn bizdiń tarifti basqa eldermen salystyryńyzdarshy. Eger Qazaqstanda 1 teńge 20 tiyn bolsa, Reseide teńgege shaqqanda – 7 teńge", - deidi Qarabaev senat kýlýarynda.
Onyń aitýynsha, joldyń sapasy jaqsy bolýy úshin oǵan kútim qajet.
"Al sizder joldy salyq tóleýshiler esebinen emes, QazAvtoJol biýdjetinen kútip ustaǵandy qalaisyzdar. Sol sebepti jalǵyz jol – aqyly joldardyń tarifin kóterý", - dep túsindirdi kólik ministri.
Qarabaev aqyly joldardyń tarifi kóp kóterilmeidi dep ýáde berdi.
"Keibireýleri eki-úsh esege ósireiik dep jatyr. Birden aitamyn, tarif eki-úsh esege kóterilmeidi, biraq belgili bir paiyzǵa qymbattaityny anyq. Bizdiń mamandar joldy kútip ustaýǵa qansha qarajat qajet, sony eskerip esepteidi. Qosymsha 1 100 tehnika satyp alý kerek", - dedi vedomstvo basshysy.
Ministr aqyly joldardyń tarifin kóterý máselesi qoǵam talqysyna shyǵarylatynyn atap ótti. Talqylaýdy naýryz aiynan bastaý josparlanyp otyr.
