QR Eńbek jáne halyqty áleýmettik qorǵaý ministrligi ataýly áleýmettik kómek (AÁK) kórsetý tetikterin jetildirýdi josparlap otyr. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
Ortalyq kommýnikatsiialar qyzmetinde onlain rejimde ótken halyqqa esep berý kezdesýi barysynda ministr AÁK kórsetý tetikterin odan ári jetildirý áleýmettik toptamany áleýmettik qyzmetter portalyna kóshirýdi, shartsyz aqshalai kómek alýshylardy áleýmettik beiimdeý sharalarymen qamtýdy, ómirlik qiyn jaǵdaidan shyqqanǵa deiin otbasyn súiemeldeýdi kózdeitindigin aitty.
«Prezidenttiń tapsyrmasy boiynsha bizdiń ministrlik áleýmettik toptamany áleýmettik qyzmet kórsetý portalyna kóshirý boiynsha jumysty bastady. Alýshylar men jetkizýshiler biryńǵai tsifrlyq alańda tikelei ózara is-qimyl jasaidy. Alýshylar áleýmettik toptama jiyntyǵyndaǵy taýarlardy óz betinshe tańdai alady», – dedi Birjan Nurymbetov.
Onyń aitýynsha, ataýly áleýmettik kómekti jetildirýdiń kelesi kezeńinde zańnamaǵa shartsyz AÁK alýshylardy áleýmettik beiimdeý sharalarymen qamtý bóliginde ózgerister engizý josparlanýda. Bul áleýmettik kelisimshartqa qol qoimaǵan jáne obektivti sebepter boiynsha jumyspen qamtý sharalarymen qamtý múmkin emes, biraq olarǵa ártúrli, onyń ishinde bilim berý, mádeni, meditsinalyq, psihologiialyq, quqyqtyq sipattaǵy qyzmetter kórsetýdi qajet etetin adamdar.
«Barlyq otbasy músheleriniń densaýlyq skriningi, júkti áielderdi mindetti túrde esepke qoiý, ómirlik qiyn jaǵdaida psihologtarǵa mindetti túrde barý, balalardy bilim berý mekemelerine tirkeý, balalardy tárbieleý boiynsha qashyqtyqtan oqytý kýrstary buǵan mysal bola alady. Bul jumysty osyndai otbasylardy ómirlik qiyn jaǵdaidan shyǵarǵanǵa deiin súiemeldep júrýge arnalǵan áleýmettik qyzmetkerler qyzmetterin jańǵyrtýmen birge júrgizý qajet. Negizgi qural «Otbasynyń tsifrlyq áleýmettik kartasy» aqparattyq júiesi bolady. Onyń pysyqtalǵan nusqasyn osy jyldyń kúzine deiin aiaqtaýdy josparlap otyrmyz. Otbasylardy ómirlik qiyn jaǵdaidan shyǵarý boiynsha vedomstvoaralyq kómek barlyq múddeli memlekettik organdar men uiymdarǵa aqparattyq júiege qol jetkizý arqyly qamtamasyz etiledi», – dedi ministr.
