Premer-Ministr Álihan Smaiylovtyń tóraǵalyǵymen ótken Qazaqstannyń Sý keńesiniń otyrysynda Sý salasyn damytýdyń 2023-2025 jyldarǵa arnalǵan keshendi josparynyń jobasy qaraldy, - dep habarlaidy "Ult aqparat" Úkimettiń baspasóz qyzmetine silteme jasap.
Keshendi josparda Sý kodeksin jańa redaktsiiada ázirleý, sý resýrstary men sý sharýashylyǵy máseleleri jónindegi ǵylymi ortalyq qurý, sýdy paidalanýdy retteýdiń ekonomikalyq tetikterin iske asyrý, sý sharýashylyǵy infraqurylymyn damytý jáne basqa da is-sharalar kózdelgen.
Atap aitqanda, Aqmola, Aqtóbe, Almaty, Jambyl, Shyǵys Qazaqstan jáne Qaraǵandy oblystarynda 8 jańa sý qoimasyn salý jáne 16 apatty sý qoimasyn rekonstrýktsiialaý josparlanýda, bul qosymsha sý kólemin jinaqtaýǵa, 124 eldi mekende sý tasqyny qaýpin azaitýǵa jáne 170 myń gektardan astam jańa sýarmaly jerlerdi ainalymǵa engizýge múmkindik beredi.
Budan basqa, sýarý arnalaryn rekonstrýktsiialaý, magistraldyq jáne sharýashylyqaralyq arnalardy avtomattandyrý, sondai-aq sý resýrstaryn basqarýdy tsifrlandyrý kózdelgen, bul sýdyń ysyraby men artyq shyǵynyn aitarlyqtai azaitýǵa múmkindik beredi.
«Aldaǵy úsh jylda biz ekonomikaǵa jáne azamattarymyz úshin barynsha tiimdi bolatyn ózekti máselelerdi sheshýimiz kerek. Aldymen, joǵary nátije beretin, sondai-aq, birinshi kezekte rekonstrýktsiialanýy tiis sý qurylystarynyń qaýipsizdigin qamtamasyz etetin basym jobalardy iriktep alýymyz kerek», — dedi Álihan Smaiylov.
Sonymen qatar Premer-Ministr Keshendi jospar sheńberinde sý sharýashylyǵy salasyna kadrlar daiarlaý júiesin jetildirý, sondai-aq zamanaýi tehnologiialyq sheshimder men ǵaryshtyq monitoringti qoldana otyryp, sýdyń jumsalýyn baqylaý tetikterin engizý jónindegi sharalardy qarastyrý qajet ekenin aitty.
