Qazaqstannyń 4 oblysyna qarasty 68 aýyldyń turǵyndary ózendi aýyz sý retinde tutynýǵa májbúr.
Bul týraly búgin QR Parlamenti Májilisinde ótken parlamenttik tyńdaýda QR Densaýlyq saqtaý vitse-ministri Aleksei Tsoi aitty, dep habarlaidy QazAqparat.
«Qolda bar pozitivti nátijelerge qaramastan adam densaýlyǵyna teris áser etetin birqatar problema bar. Máselen, Ońtústik Qazaqstan, Jambyl, Batys Qazaqstan jáne Almaty oblystarynyń 68 eldi mekeni bulaqtar men shaǵyn ózenderden tazartylmaǵan sýdy aýyz sý retinde paidalanýǵa májbúr. OQO, Qaraǵandy, Aqmola oblystarynyń keibir eldi mekenderindegi sý daiyndaý qurylǵylary 20 jyldan astam ýaqyt boiy kúrdeli jóndeý kórmegen. Nátijesinde olarda sýdy tazartý tiimdiligi óte tómen. Aýyz sý sapasy talap etiletin parametrlerge jetpeidi», - dedi vitse-ministr.
Onyń aitýynsha, lastanǵan sýdy paidalaný jiti infektsiialyq aýrýlardyń týyndaýyna sebepker bolýy múmkin. Sonymen qatar adamnyń negizgi ómirlik qyzmet fnktsiialaryna da áserin tigizedi.
«Aýyldyq eldi mekenderde ákimdikter janynda sýmen jabdyqtaý nysandaryna qyzmet kórsetýge arnalǵan jáne barlyq deńgeilerde óndiristik zerthanalyq baqylaýdy júzege asyratyn uiymdar qurý jónindegi ministrliktiń usynystary «Aq bulaq» baǵdarlamasyna engizilgen bolatyn. Biraq, sýmen jabdyqtaý nysandaryn balansqa qabyldaý jáne keiin olarǵa qyzymet kórsetý máselesi is júzinde barlyq aimaqta ózekti bolyp qalýda», - dedi ol.
Onyń sózine qaraǵanda, búgingi kúni 120-dan astam sý qubyry men 600-den astam ortalyqtandyrylmaǵan sýmen jabdyqtaý kózi vedomstvolyq qajettiliktermen qamtamasyz etilmegen. 140-tan astam sý qubyry óndiristik baqylaýmen qamtylmaǵan.
Aita keteiik, QR Parlamenti Májilisinde elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý ótti. Sharaǵa Májilis Tóraǵasy Nurlan Nyǵmatýlin, QR Premer-Ministriniń orynbasary - Aýyl sharýashylyǵy ministri Asqar Myrzahmetov, Qarjy ministri Baqyt Sultanov, Investitsiialar jáne damý ministi Jeńis Qasymbek, múddeli memlekettik organdardyń, ǵylymi-zertteý institýttarynyń ókilderi qatysty.
