Qazaqstanda 420 myńnan astam adam vaktsinanyń 2 dozasyn aldy. Bul týraly QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Ózderińiz de bilesizder, Qazaqstanda vaktsinatsiia osy jyldyń aqpanynda bastaldy. Búginde qazaqstandyqtarǵa 2,3 mln doza vaktsinatsiiaǵa qoljetimdilik qamtamasyz etilgen. 1 sáýirden bastap vaktsinatsiia qarqynyn 12 esege arttyryp, iaǵni, táýligine 11 myńnan búginde 135 myńǵa jetkizip otyrmyz. Qazirgi ýaqytta bizde bizde úsh vaktsina bar jáne azamattarǵa tańdaý múmkindigi berilip otyr. Olar - «Spýtnik V», QazVac jáne Hayat Vah. Vaktsinalar Qazaqstannyń barlyq óńirinde qoljetimdi», - dedi ol Ortalyq kommýnikatsiialar qyzmetindegi baspasóz máslihaty barysynda.
Ministrdiń atap ótýinshe, búginge deiin 1 507 389 azamat vaktsinanyń 1-komponentin, 422 279 adam 2-komponentin aldy. Sonymen qatar ol elimizdiń barlyq meditsinalyq uiymdaryn qajetti temperatýra rejimimen qamtamasyz etý, muzdatqysh jabdyqtaryn satyp alý boiynsha aýqymdy jumys júrgizilgendigin atap ótti.
«Eń mańyzdysy mobildi ekpe jasaý brigadasy oqytyldy. Qazirgi ýaqytta shamamen 11 myń meditsina qyzmetkeri vaktsinatsiia protsesin qamtamasyz etýde. Elimizde 1,4 myń egý pýnkti quryldy. Onyń ishinde 400-i kóshpeli pýnkt. Olar eńbek ujymdaryna, saýda úilerine, iri saýda ortalyqtaryna baryp ekpe jasaidy. Sondyqtan da vaktsinatsiialaý barysy qarqyndy júrgizilip jatyr dep aita alamyz. El turǵyndarynyń vaktsinaǵa degen senimi de artyp keledi», - dedi Aleksei Tsoi.
