QR Premer-Ministri Asqar Maminniń tóraǵalyǵymen ótken Úkimet otyrysynda QR tsifrlyq damý, innovatsiialar jáne aeroǵarysh ónerkásibi birinshi vitse-ministri Baǵdat Mýsin halyqty joǵary jyldamdyqty internetpen qamtamasyz etý boiynsha atqarylyp jatqan jumystar týraly baiandady, dep habarlaidy "Ult aqparat".
«Nur Otan» partiiasynyń sailaýaldy baǵdarlamasy aiasynda jyl sońyna deiin 250-den astam turǵyny bar eldi mekenderdi joǵary jyldamdyqty internetpen qamtamasyz etý tapsyryldy. B. Mýsin atap ótkendei, búgingi tańda 118 qala men 4 273 aýyl 3G jáne 4G tehnologiiasyn qoldana otyryp, joǵary jyldamdyqty internetpen jabdyqtalǵan. Qalalar men iri eldi mekenderde «optikalyq» bailanys qoldanylady. Jyl sońyna deiin 928 aýyldy internetpen qamtamasyz etý josparlanýda. Onyń 97-si — qyrkúiekke deiin.
«Búginde 4 422 mektep 8 Mbit joǵary jyldamdyqty internetpen qamtamasyz etilgen. Taǵy 1 086 mekteptiń internetti osy deńgeige kóterýge tehnikalyq múmkindigi bar. Ol úshin ákimdikter tiisti qarajatty qarastyrýy qajet», — dedi B. Mýsin.
Sondai-aq qamtý aimaǵyn keńeitý jáne internetke qosylý jyldamdyǵyn arttyrý máselesin sheshý úshin osy jyldyń naýryz aiynan bastap 306 bazalyq stantsiia salyndy jáne onyń 1 802-si jańǵyrtyldy. 105 myńnan astam jańa úi symdy internetke qosylǵan.
Sonymen qatar Mýsin internet sapasyn jaqsartýdyń qosymsha sharalary týraly baiandady. Máselen, Nur-Sultan, Almaty jáne Shymkent qalalarynda radiojiilik spektri taldandy, onyń negizinde qosymsha antenna-dińgek qurylystaryn ornatý qajet bolatyn naqty oryndar anyqtaldy.
«Nur-Sultan, Almaty jáne Shymkent qalalarynda radiojiilik spektrlerine taldaý jasaldy. Osynyń negizinde qosymsha antenna-dińgekti qurylystar ornatylýy kerek naqty lokatsiialardy aiqyndadyq.
Biz sizden ákimdikterge jer telimderin bólýge jáne onda elektr energiiasyn ótkizýge kómek kórsetýdi tapsyrýyńyzdy suraimyz. Sodan keiin biz ákimdiktermen birlesip, antenna-dińgek qurylystaryn turǵyzatyn jeke investordy tabýǵa daiynbyz, sonyń nátijesinde signaldary álsiz aimaqtar máselesin osylai sheshemiz», — dedi Mýsin.
Onyń aitýynsha, mundai jumysty barlyq jerde júrgizý qajet. Budan ózge Mýsin jyljymaly ólsheý keshenderimen, avtomobildermen jáne tasymaldanatyn ólsheý aspaptarymen jabdyqtaý úshin qosymsha qarajat bólý qajet ekenin atap ótti.
Sonymen qatar endi bilim berý platformalary jergilikti jerlerde Qazaqtelekomnyń derekterdi óńdeý ortalyqtarynda ornalasatyny atalyp ótti. Buǵan deiin bári ortalyqtandyrylǵan bolatyn jáne bul bir jerde internet-trafiktiń jinalýynyń belgili bir qiyndyqtaryn týdyrdy. Bul sheshim óńirler boiynsha bilim berý resýrstaryn jergiliktendirýge múmkindik beredi. Tiisinshe, bul internetke júktemeni azaitady. Budan ózge bul sheshim beine konferentsiia bailanysy fýnktsiiasyn paidalaný múmkindigine yqpal etetin bolady.
