Qazaqstanda 340 eldi mekende sý basý qaýpi joiyldy. Búginde 285 eldi mekendi sý basý qaýpi saqtalǵan, - dep habarlaidy "Ult aqparat" TJM baspasóz qyzmetine silteme jasap.
"2021-2023 jyldarǵa arnalǵan sý tasqynyna qarsy is-sharalardyń Jol kartasy sheńberinde 2021 jyly iske asyrý josparlanǵan 68 is-sharanyń 33-i oryndaldy. Aiaqtalý merzimi 2022-2023 jyldarǵa josparlanǵan 4 is-shara merziminen buryn oryndaldy. Atap aitqanda, 9,4 shaqyrym ózen arnalary qaita qurylyp, 22,2 shaqyrym tazartyldy. 8,2 shaqyrym qorǵanys bógetteri salynyp, 8,1 shaqyrym bógetterde aǵymdaǵy jóndeý jumystary júrgizildi. Eki gidrotehnikalyq qurylys salyndy. 4 jergilikti qulaqtandyrý júiesi ornatyldy. Avtomobil jolynyń astyndaǵy sý ótkizý qubyry aýystyryldy" - delingen habarlamada.
Budan basqa, atalǵan eldi mekenderdi sý tasqynyna qarsy qorǵaý úshin TJM jergilikti atqarýshy organdarmen iske asyrylatyn eki negizgi baǵdarlamalyq qujat sheńberinde sý tasqynyna qarsy jumystardyń oryndalýyna monitoring boiynsha jumys júrgizip jatyr.
Jalpy sý tasqynyna qarsy is-sharalar keshenin iske asyrý barysynda 340 eldi mekennen sý basý qaýpi joiylyp, 385 eldi mekende qaýip azaitylǵan. Búgingi kúni sý tasqyny qaýpi bar 1 010 eldi mekenniń 285-i úshin yqtimal qaýip saqtalyp otyr.
Ótken táýlikte óńirler aýmaǵynda jergilikti atqarýshy organdar men TJM kúshteri Aqmola, Aqtóbe, Batys Qazaqstan, Shyǵys Qazaqstan, Pavlodar, Túrkistan oblystarynda jáne Nur-Sultan qalasynda 144 379 m3 erigen qar sýyn sorý jumystaryn júrgizdi. Sondai-aq Aqmola, Batys Qazaqstan, Shyǵys Qazaqstan, Pavlodar, Aqtóbe oblystarynda 7 961 inertti material salynǵan qap tóselse, Batys Qazaqstan oblysynda 250 m2 alqapta ózenderde muz kesý jumystary júrgizilgen.
Vedomstvo málimetinshe, Batys Qazaqstan oblysynda avariialyq-qutqarý jumystaryna Mańǵystaý jáne Atyraý oblystarynyń TJD kúshteri men quraldary jeke quramnan 92 adam, 13 birlik tehnika, 2 júzý quraly jáne 6 motopompa jumyldyrylǵan. Sondai-aq, qazirgi ýaqytta Batys Qazaqstan oblysynda sý basqan 53 turǵyn úii men Aqtóbe oblysynda 57 saiajai úii baqylaýda tur.
"Ótken táýlikte Batys Qazaqstan jáne Aqtóbe oblystarynda 773 adam evakýatsiialandy. Olar ýaqytsha evakýatsiialaý pýnktteri men týystarynyń úilerine ornalastyryldy. Qaitys bolǵan jáne zardap shekken adamdar týraly aqparat tirkelgen joq.
TJM «Qazaviaqutqarý» AQ tikushaǵymen Jaqsybai aýylynan Oral qalasyna 2 júkti áiel jetkizildi" - delingen resmi habarlamada.
Vedomstvo málimetinshe, ótken táýlikte Batys Qazaqstan oblysynda 99 turǵyn úidi, Aqtóbe oblysynda 57 saiajai úiin jáne 21 aýla aýmaǵyn sý basqan.
Sondai-aq, Aqtóbe oblysynyń respýblikalyq mańyzy bar joldarynyń 2 ýchaskesinde, sondai-aq Aqtóbe, Qaraǵandy, Batys Qazaqstan jáne Aqmola oblystarynyń oblystyq jáne jergilikti mańyzy bar 14 ýchaskesinde sý tasyp jatyr.
"Bul jumystarǵa TJM, IIM, UQK ShQ, JAO 2 229 adam, 489 birlik tehnika, 238 sý aidaý quraly jáne 27 júzý quraly jumyldyryldy. Onyń ishinde TJM jeke quramynan 974 adam, 117 birlik tehnika, 145 sý aidaý quraly, 21 júzý quraly bar" - delingen ministrlik taratqan aqparatta.
