Qazaqstanda 3 myń ustaz ben dárigerge páter beriledi. Atalǵan bastamany Qazaqstanyń ipotekalyq kompaniiasy qolǵa alyp otyr, dep habarlaidy Sputnik Qazaqstan tilshisi.
Kompaniia basshysy Ádil Muhamedjanovtyń aitýynsha, baǵdarlama sharttaryna sáikes, árbir páter 20 jylǵa jalǵa beriledi. Alaida baspanany kez kelgen ýaqytta eshbir aiyppulsyz merziminen buryn satyp alýǵa bolady. Kiristiń kólemi jetkiliksiz bolsa, kepilgerlerdi tartýǵa múmkindik bar. Bastapqy jarna salýdyń qajeti joq.
Osy baǵdarlama qatysatyn azamattardyń tizimin ministrlikter jasaidy. Al Qazaqstannyń ipotekalyq kompaniiasy úmitkerlerdiń tólem qabilettiligin tekserip, jaldaý kelisimsharttaryn rásimdeidi. Jospar boiynsha aldaǵy eki jylda 3 000 arendalyq páter taratylady. Ol ustazdar men dárigerler arasynda teń bólinedi.
"Biz aldymen ministrlikterdiń tizmin kútemiz. Odan keiin daiyn páterlerli satyp alamyz da, tizim boiynsha taratamyz. Páterlerdi satyp alýǵa 40 milliard teńgemiz bar. Bul – biýdjettik emes qarajat. Bir páterdiń aýdany 80 sharshy metrden aspaidy. Sosyn Nur-Sultan men Almaty qalalarynda bir sharshy metrdiń baǵasy 260 000 teńgeden aspaýy tiis. Al aimaqtarda atalǵan kórsetkish 220 000 teńgeden artyq bolmaýy shart", - deidi Muhamedjanov elordada ótken baspasóz máslihatynda.
Resmi málimetke sáikes, 50 sharshy metrdi quraityn arendalyq páterdiń ortasha baǵasy 13 million teńge bolsa, 20 jyldyń ishinde ai saiyn 60-70 myń teńge tóleý kerek.
"Sosyn páterdi rásimdegeni úshin 1 protsenttik tólemaqy bar. Máselen, 13 million teńgeniń 1 protsenti – 130 000 teńge. Bul kóp aqsha emes dep oilaimyn. Osy somany bizdiń jumysymyz úshin tóleý kerek. Al jalpy jyldyq mólsherleme 3 protsentti quraidy. Sebebi biz páterlerdi satyp alǵanda aqshany qaryzǵa alamyz. Ol shyǵyndardy da óteýimiz kerek", - dep atap kórsetti ol.
Aita keteiik, búginde densaýlyq saqtaý salasynda 15 000 qyzmetker baspanaǵa zárý. Al bilim salasynda 10 000 maman pátersiz júr.
