قازاقستاندا 3 مىڭ ۇستاز بەن دەرٸگەرگە پەتەر بەرٸلەدٸ. اتالعان باستامانى قازاقستانىڭ يپوتەكالىق كومپانيياسى قولعا الىپ وتىر, دەپ حابارلايدى Sputnik قازاقستان تٸلشٸسٸ.
كومپانييا باسشىسى ەدٸل مۇحامەدجانوۆتىڭ ايتۋىنشا, باعدارلاما شارتتارىنا سەيكەس, ەربٸر پەتەر 20 جىلعا جالعا بەرٸلەدٸ. الايدا باسپانانى كەز كەلگەن ۋاقىتتا ەشبٸر ايىپپۇلسىز مەرزٸمٸنەن بۇرىن ساتىپ الۋعا بولادى. كٸرٸستٸڭ كٶلەمٸ جەتكٸلٸكسٸز بولسا, كەپٸلگەرلەردٸ تارتۋعا مٷمكٸندٸك بار. باستاپقى جارنا سالۋدىڭ قاجەتٸ جوق.
وسى باعدارلاما قاتىساتىن ازاماتتاردىڭ تٸزٸمٸن مينيسترلٸكتەر جاسايدى. ال قازاقستاننىڭ يپوتەكالىق كومپانيياسى ٷمٸتكەرلەردٸڭ تٶلەم قابٸلەتتٸلٸگٸن تەكسەرٸپ, جالداۋ كەلٸسٸمشارتتارىن رەسٸمدەيدٸ. جوسپار بويىنشا الداعى ەكٸ جىلدا 3 000 ارەندالىق پەتەر تاراتىلادى. ول ۇستازدار مەن دەرٸگەرلەر اراسىندا تەڭ بٶلٸنەدٸ.
"بٸز الدىمەن مينيسترلٸكتەردٸڭ تٸزمٸن كٷتەمٸز. ودان كەيٸن دايىن پەتەرلەرلٸ ساتىپ الامىز دا, تٸزٸم بويىنشا تاراتامىز. پەتەرلەردٸ ساتىپ الۋعا 40 ميلليارد تەڭگەمٸز بار. بۇل – بيۋدجەتتٸك ەمەس قاراجات. بٸر پەتەردٸڭ اۋدانى 80 شارشى مەتردەن اسپايدى. سوسىن نۇر-سۇلتان مەن الماتى قالالارىندا بٸر شارشى مەتردٸڭ باعاسى 260 000 تەڭگەدەن اسپاۋى تيٸس. ال ايماقتاردا اتالعان كٶرسەتكٸش 220 000 تەڭگەدەن ارتىق بولماۋى شارت", - دەيدٸ مۇحامەدجانوۆ ەلوردادا ٶتكەن باسپاسٶز مەسليحاتىندا.
رەسمي مەلٸمەتكە سەيكەس, 50 شارشى مەتردٸ قۇرايتىن ارەندالىق پەتەردٸڭ ورتاشا باعاسى 13 ميلليون تەڭگە بولسا, 20 جىلدىڭ ٸشٸندە اي سايىن 60-70 مىڭ تەڭگە تٶلەۋ كەرەك.
"سوسىن پەتەردٸ رەسٸمدەگەنٸ ٷشٸن 1 پروتسەنتتٸك تٶلەماقى بار. مەسەلەن, 13 ميلليون تەڭگەنٸڭ 1 پروتسەنتٸ – 130 000 تەڭگە. بۇل كٶپ اقشا ەمەس دەپ ويلايمىن. وسى سومانى بٸزدٸڭ جۇمىسىمىز ٷشٸن تٶلەۋ كەرەك. ال جالپى جىلدىق مٶلشەرلەمە 3 پروتسەنتتٸ قۇرايدى. سەبەبٸ بٸز پەتەرلەردٸ ساتىپ العاندا اقشانى قارىزعا الامىز. ول شىعىنداردى دا ٶتەۋٸمٸز كەرەك", - دەپ اتاپ كٶرسەتتٸ ول.
ايتا كەتەيٸك, بٷگٸندە دەنساۋلىق ساقتاۋ سالاسىندا 15 000 قىزمەتكەر باسپاناعا زەرۋ. ال بٸلٸم سالاسىندا 10 000 مامان پەتەرسٸز جٷر.
