2025 jylǵa deiin 5 ýniversitettik jáne 3 kópbeiindi aýrýhana salynady. Bul týraly Úkimet otyrysynda QR Densaýlyq saqtaý ministri Ajar Ǵiniiat aitty, dep habarlaidy QazAqparat tilshisi.
Memleket basshysy Qasym-Jomart Toqaev bergen tapsyrmasynda densaýlyq saqtaý júiesiniń resýrstaryn, atap aitqanda, 20 aýrýhananyń qunyn memlekettik-jekeshelik áriptestik tetikterin paidalana otyryp, qaita qaraý qajettigin erekshe atap ótti.
Kópbeiindi aýrýhanalar salý boiynsha respýblikalyq memlekettik-jekeshelik áriptestik jobalarynyń tizbesin ońtailandyrý maqsatynda Densaýlyq saqtaý ministrligi qoldanystaǵy «Deni saý ult» ulttyq jobasyn iske asyrý aiasynda birinshi kezeńde 2025 jylǵa deiin 5 ýniversitettik aýrýhana jáne 3 kópbeiindi aýrýhana salýdy júzege asyrýdy josparlap otyr. Bul rette, qalǵan 12 joba 2026 jyldan bastap kezeń-kezeńimen engiziletin bolady», - dedi Ajar Ǵiniiat.
Onyń atap ótýinshe, búgingi tańda Indýstriia jáne infraqurylymdyq damý, Ulttyq ekonomika jáne Qarjy ministrlikterimen meditsinalyq buiymdarsyz aýrýhana qurylysynyń 1 sharshy metriniń shekti qunyn jáne 1 tósek-orynǵa arnalǵan shekti alań normativin aiqyndaý jumysyn júrgizip jatyr. Sondai-aq ońtaily qarjy modelin pysyqtaý jáne joǵary atalǵan 8 joba boiynsha shyǵystardy ońtailandyrýdy qolǵa aldy.
«Joǵaryda atalǵan tapsyrmalar aýrýhanalardy salý jónindegi baǵdarlamany iske asyrýdyń biryńǵai tásili men ońtaily nusqasy jóninde usynystar ázirleýge múmkindik beredi. Ýniversitettik aýrýhanalardy iske asyrýdyń basymdyǵy barlyq qalǵan jobalardy kadrlarmen qamtamasyz etý jáne bilim, ǵylym men praktikanyń úshtuǵyrlyǵy qaǵidatyn is júzinde qoldaný qajettiginen týyndaidy», - dedi ol.
