Foto: olympic.kz
Mádeniet jáne sport ministrligi halyqaralyq sporttyq jarystardyń chempiondary men júldegerlerine, jattyqtyrýshylarǵa jáne sport túrleri boiynsha qurama komandalarynyń múshelerine beriletin aqshalai syiaqy mólsherin jariialady, - dep habarlaidy «Ult aqparat» ministrliktiń baspasóz qyzmetine silteme jasap.
Ministrlik málimetinshe, eń kóp aqshalai syilyqty olimpiada, paralimpiada jáne sýrdlimpiada oiyndarynyń chempiondary men júldegerleri alady. Altyn júldeger atanǵan sportshylar men olardyń jattyqtyrýshylaryna árqaisysyna 250 000 dollardan beriledi, kúmis júlde úshin 150 000 dollardan, qola úshin 75 000 dollardan beriledi.
Álemdik rekord ornatqan kez kelgen qazaqstandyq sportshyǵa memleketten aqshalai syiaqy beriledi. Rekord ornatqan sportshy men onyń jattyqtyrýshysy 5000 dollar kóleminde syiaqy alady.
Al Qazaqstan boks federatsiiasy Parij olimpiadasynda jeńiske jetken boksshylarǵa tólenetin syiaqy mólsherin atady.
“Buǵan deiin Parij olimpiadasynda jetistikke jetken boksshylarǵa Qazaqstan boks federatsiiasy tarapynan beriletin syiaqy mólsheri jariialanǵan edi:
Birinshi oryn úshin – 220 myń dollar;
Ekinshi oryn úshin – 120 myń dollar;
Úshinshi oryn úshin – 70 myń dollar;
Tótrinshi oryn úshin – 30 myń dollar;
Besinshi oryn úshin – 10 myń dollar”, – delingen federatsiiasy habarlamasynda.
Aita keteiik, halyqaralyq olimpiada komiteti sportshylarǵa aqshalai syilyq tólemeidi. Qatysýshy elder ǵana óz sportshylaryn marapattaidy. Al Qazaqstan sportshylaryna eń kóp syiaqy (altynǵa 250 000 dollar) beretin elder tiziminde.
Syiaqy boiynsha reitingtiń kóshbasshysy – Singapýr, bul elde chempionǵa million dollarlyq chek beriledi. Alaida, bul aqshaǵa salyq salynady, qarjynyń bir bóligi sportty damytýǵa jáne keiingi jattyǵý shyǵyndaryn jabýǵa jumsalady.
Ulybritaniiada, Shvetsiiada, Horvatiiada, Norvegiiada jáne álemniń basqa da birqatar elderinde olimpiada jeńimpazdaryna eshteńe tólenbeidi. AQSh-ta olimpiada chempiony 37,5 myń dollar alsa, Reseide 54,5 myń dollar alady. Al Nigeriia men Senegal úkimetteri júldeli sportshylaryna siyr syiǵa tartady.
