Memlekettik qyzmet salasyndaǵy zańnamany buzǵany úshin 187 adam ákimshilik jaýapkershilikke tartyldy, dep habarlady Qazaqstan memlekettik qyzmet isteri jáne sybailas jemqorlyqqa qarsy is-qimyl agenttigi.
Alǵashqy jartyjyldyqta barlyǵy 194 ákimshilik is qozǵaldy. Jaýapkershilikke tartylǵandar biýdjetke 5,6 million teńge (16 myń dollarǵa jýyq) aiyppul tóledi.
Sheneýnikterge qandai quqyq buzshylyq úshin aiyppul salyndy?
Astanada sot qaýlysymen ákimshilik memlekettik qyzmetti ielenýge konkýrstyq irikteý rásimderin buzǵany úshin investitsiialar jáne damý ministrligi indýstriialyq damý jáne ónerkásiptik qaýipsizdik komitetiniń konkýrstyq komissiiasynyń músheleri ákimshilik jaýapkershilikke tartyldy. Zańdy saqtamaǵan memlekettik qyzmetkerler 36 myń teńge, nemese 15 AEK (103 dollar shamasynda) aiyppul tóledi.
Jambyl oblysynda qyzmetkerlerin ákimshilik memlekettik qyzmetten zańsyz bosatqany úshin Aqyrtóbe aýyldyq okrýginiń ákimi de 15 AEK aiyppulmen jazalandy.
Aqtóbe oblysynda Stepnoi aýyldyq okrýginiń ákimi kásipkerlik qyzmetpen ainalysqany úshin ákimshilik jaýapkershilikke tartyldy. Kodekstiń 154-babyna sáikes 200 AEK nemese 481 myń teńge kóleminde (1375 dollar shamasynda) aiyppul salý túrinde jazaǵa tartyldy.
Aqmola oblysynda Esil aýdany Orlovka aýyly ákimi apparatynyń mamany tabystary men múlki týraly deklaratsiia tapsyrmaǵany úshin jazalandy. Ol 50 AEK, nemese 120 250 teńge (343 dollar shamasynda) aiyppul tóleýi tiis.
