Foto: polisia.kz
Qazaqstandyq politseiler bopsalaýmen ainalysqan 20-dan astam jastar tobyn ustady, – dep habarlaidy Polisia.kz.
Ishki ister ministrligi jastar arasyndaǵy bopsalaý faktilerin anyqtady. Osy jyly politsiia qyzmetkerleri bopsalaýdyń 400-den astam deregin tirkedi, onyń 39-y mektepter men kolledjderde jasalǵan.
Oqý oryndarynda 60 myńǵa jýyq profilaktikalyq is-shara ótkizildi, onda bopsalaý, býlling jáne zorlyq-zombylyq kórsetýmen bailanysty máseleler talqylandy. Mektepter men kolledjderde anonimdi saýalnamalar júrgizilip, oqýshylar arasynda bopsalaýdyń 50-den astam yqtimal faktisi anyqtaldy. Barlyq jaǵdai tekseriletin bolady.
Mundai faktilerdi ýaqytyly anyqtap, jolyn kesý jasóspirimder qylmysynyń aldyn alýǵa yqpal etedi. Jyl basynan beri bopsalaýmen ainalysatyn 23 jastar tobynyń áreketine tosqaýyl qoiyldy.
Máselen, qyrkúiek aiynda Aqtóbe qalasynda uiymdasqan qylmysqa qarsy kúres basqarmasynyń qyzmetkerleri kolledjdiń kámeletke tolmaǵan stýdentin ustady. Ol 15 jastaǵy jasóspirimnen 50 myń teńge kóleminde aqsha bopsalaǵan. Kúdikti quryqtalyp, sotqa deiingi tergeý bastaldy. Jambyl oblysynda jasóspirim jeke derekterdi taratamyn dep qorqytý arqyly óz qatarlastarynan aqsha bopsalaǵan.
Osyndai 8 fakt tirkelip, qylmystyq is sotqa jiberildi. Petropavl qalasynda politsiia qyzmetkerleri jastar tobynyń múshelerin ustady. Olar zorlyq-zombylyq pen qorqytý arqyly jábirlenýshilerdi qaryz rásimdeýge májbúrlep, keiinnen ony qolma-qol aqshaǵa ainaldyryp otyrǵan. Kúdiktiler qamaýǵa alyndy.
IIM ókilderi qylmystyń bul túri úshin 14 jastan bastap qylmystyq jaýapkershilik qarastyrylǵanyn eskertti.
