2021 jyly Qazaqstanda onkologiialyq aýrýlardyń 36 myńnan astam jańa jaǵdaiy tirkelgen. Bul kórsetkish 2020 jylmen salystyrǵanda 4 myńǵa kóbirek, dep habarlaidy QazAqparat.
«2021 jyldyń qorytyndysy boiynsha, onkologiialyq aýrýlarmen syrqattaný 9,8%-ǵa ósip, 100 myń turǵynǵa shaqqanda 190,3-ti qurady. Iaǵni, 2021 jyly 36 myńnan astam jańa jaǵdai anyqtaldy, bul 2020 jylmen salystyrǵanda 4 myńǵa artyq. Muny 2020 jyly Covid-19 jaǵdaiyna bailanysty turǵyndardyń emhanaǵa bara almaýymen bailanystyrýǵa bolady. 2021 jyly emhanaǵa barǵan turǵyndardyń sany kóp, skriningten ótken turǵyndar sany kóp», - dedi Qazaq onkologiia jáne radiologiia ǵylymi-zertteý institýtynyń basshysy, QR Densaýlyq saqtaý ministrliginiń shtattan tys bas onkology Diliara Qaidarova Ortalyq kommýnikatsiialar qyzmetinde ótken baspasóz konferentsiiasynda.
Onyń aitýynsha, Qazaqstanda 194 myń naýqas esepte tur.
QR DSM meditsinalyq kómekti uiymdastyrý departamenti direktorynyń orynbasary Gúlnar Janǵarashevanyń aitýynsha, onkologiialyq aýrýlarmen aýyratyndardyń negizgi úlesin (59%) eńbekke qabiletti jastaǵy adamdar quraidy.
«Onkologiialyq aýrýlardy erte anyqtaý 27%-ǵa deiin ósti. Aýrý boiynsha birinshi orynda sút bezi obyry, ekinshi orynda – ókpe obyry, úshinshi orynda – kolorektaldy qaterli isik, tórtinshi orynda – asqazan obyry, besinshi orynda – jatyr moiny obyry tur. Bizde ólim-jitim 4,7%-ǵa tómendedi jáne biyl 13 665 jaǵdaidy qurady. Ólim-jitim qurylymynda birinshi orynda ókpe obyry, ekinshi orynda – asqazan obyry, úshinshi orynda – kolorektaldy qaterli isik, tórtinshi orynda – sút bezi obyry tur», - dep tolyqtyrdy D.Qaidarova.
Spiker Qazaqstanda onkologiialyq naýqastar úshin emdeý tegin ekenin eske saldy. Oǵan hirýrgiialyq emdeý, sáýlelik terapiia, himioterapiia, maqsatty terapiia, immýnoterapiia kiredi. Jyl saiyn naýqastardy emdeýge 66 mlrd teńgeden astam qarajat qajet.
