Qazaqstanda 12 myńnan astam áleýmettik sala qyzmetkeri testileýden ótedi, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Atalysh sharany QR Eńbek jáne halyqty áleýmettik qorǵaý ministrligi (budan ári – QR Eńbekmini) biylǵy jylǵy 23-27 qarasha aralyǵynda uiymdastyrmaqshy. Ondaǵy maqsat áleýmettik qyzmet kórsetý sapasyn arttyrý. Osy jumystar aiasynda áleýmettik qyzmetkerler, sondai-aq meditsinalyq-áleýmettik mekemelerdiń direktorlary, jumyspen qamtý ortalyqtarynyń direktorlary, úide áleýmettik kómek kórsetý bólimsheleriniń meńgerýshileri testileýden ótedi.
Testileý zańnamalyq aktilerdi, halyqty áleýmettik qorǵaý salasyndaǵy arnaýly áleýmettik qyzmetterdi kórsetý standarttaryn, áleýmettik qyzmetkerlerdiń etikasyna qoiylatyn talaptardy bilý deńgeiin anyqtaýǵa baǵyttalǵan.
Testileýden ótýshilerge negizgi blokta zańnamany, etikalyq talaptardy bilýge jáne praktikalyq mindetterdi sheshýge arnalǵan suraqtar qoiylady.
Sondai-aq, áleýmettik qyzmetkerdiń fýnktsiialaryn júzege asyrý úshin qajetti sapanyń bolýy men deńgeiin anyqtaý úshin psihologiialyq test arqyly jeke sipattamalardy ólsheý qarastyrylǵan.
Osyǵan bailanysty, mundai testileý el aýqymynda alǵash ret ótkizilip otyrǵandyqtan, QR Eńbekmini shekti ball jinai almaǵan adamdarǵa qatysty sanktsiialar qoldanbaidy. Shekti ball ala almaǵandar úshin oqytý seminarlary men qaita testileý uiymdastyrylady. Joǵary nátijelerimen erekshelengenderdi keiinnen laýazymyn joǵarylatý, respýblikalyq jáne oblystyq mańyzy bar jobalarǵa qatysý úshin sarapshylar retinde tartý úshin kadr rezervine qosý josparlanýda. Sondai-aq olardyń kandidatýralary QR Eńbekmini janyndaǵy Áleýmettik jumys jónindegi saraptamalyq keńeske jáne ózge de jaýapty qoǵamdyq qyzmetterge engizý úshin usynylatyn bolady.
«Sonymen qatar, testileý qorytyndysy boiynsha joǵary nátijelerge qol jetkizgen adamdar úshin áleýmettik jumystyń ozyq tehnologiialary boiynsha arnaiy seminarlar uiymdastyrylady. Bul jobany QR Eńbek jáne halyqty áleýmettik qorǵaý ministrligi QR Tuńǵysh Prezidenti – Elbasy Qorynyń jáne Unicef Kazakhstan qoldaýymen iske asyrýda»,-delingen habarlamada.
