Qazaqstanda keiingi 10 jylda náresteniń shetineý kórsetkishi eki ese azaidy. Bul týraly QR Bilim jáne ǵylym vitse-ministri Bibigúl Asylova málim etti, dep habarlaidy QazAqparat.
«Densaýlyq saqtaý salasynda kóptegen kórsetkish boiynsha oń dinamika baiqalady. Keiingi 10 jylda náresteniń shetineý kórsetkishi eki ese azaiǵan. 0-14 jas aralyǵyndaǵy balalardyń aýrýǵa shaldyǵý kórsetkishi, atap aitqanda alǵashqy diagnozy boiynsha 2019 jyldyń 9 aiynda 100 myń balanyń ishinde 19 164 jaǵdai tirkeldi. Odan bólek áleýmettik qorǵaýdyń mańyzdy komponenti – bala týǵannan bastap beriletin áleýmettik járdemaqy. Bul tólem bala tapqan barlyq áielge berilýde. 2019 jyly bul járdemaqy 400 myń anaǵa berildi. Bul maqsatta respýblikalyq biýdjetten 44 mlrd teńge bólindi», - dedi Bibigúl Asylova «Balalyq shaqty qorǵaý júiesiniń tiimdiligi jáne balanyń ál-aýqaty: memleket pen azamattyq qoǵamnyń birigýi» taqyrybynda baspasóz máslihatynda.
Onyń aitýynsha múgedek balalardyń jáne az qamtylǵan otbasylardyń balalaryn áleýmettik turǵyda qoldaý sharalary júzege asyrylyp jatyr.
«Quqyqbuzýshylyqqa qarsy kúres salasynda máselen, sýitsidtiń aldyn alýǵa qatysty sharalar qolǵa alynýda. Politsiianyń aýmaqtyq organdary balalardyń quqyǵyna qarsy aqparat ornalastyrylǵan 1 454 sheteldik internet-resýrsty anyqtady. Sýitsidtiń árbir faktisi boiynsha sotqa deiingi tergeý amaldary júrgiziledi. Ondai isterdiń árbiri jiti zerttelip, oqiǵanyń mán jaiy, óz-ózine qol jumsaýdyń naqty sebebi anyqtalady», - dedi ol.
