QR Eńbek jáne halyqty áleýmettik qorǵaý ministri Birjan Nurymbetov IH Azamattyq forýmda múgedekterdi syrttai kýálandyrý jumystary týraly aityp berdi, dep habarlaidy QazAqparat.
«Múgedektikti syrttai kýálandyrý – problemalyq máselelerdiń biri. Qazirgi ýaqytta múgedektik alatyn adam birneshe instantsiiadan ótýge májbúr. Aldymen emhanaǵa júginedi, sodan keiin meditsinalyq-áleýmettik saraptamaǵa, sosyn ákimdik bólimine barýy kerek. Jumys máselesi týyndasa, jumyspen qamtý ortalyǵyna da barady. Osy jumystardy azaitý úshin biz syrttai kýálandyrýǵa aýysqymyz keledi. Munda tek emhanada tekserýden ótý kerek bolady, al meditsinalyq-áleýmettik saraptama, konsiliým syrttai ótedi. Iaǵni, járdemaqy, jeke ońaltý baǵdarlamasy avtomatty túrde taǵaiyndalady, oǵan qosa jumyspen qamtý ortalyǵyndaǵy qyzmetterdi avtomattandyrýdy josparlap otyrmyz», - dedi ministr úkimettik emes uiymdardyń ókilderimen kezdesýde.
Onyń aitýynsha, birinshi toptaǵy múgedekterdi kútý boiynsha biryńǵai járdemaqy engizý máselesi de pysyqtalyp jatyr.
«Ókinishke orai, qazirgi zańnamada áleýmettik turǵyda ádiletsiz bolyp kórinetin normalar bar. Mysaly, bizdiń elimizde birinshi toptaǵy múgedektigi bar 65 myń adam turady. Olardyń 24 myńǵa jýyǵy jeke kómekshi qyzmetterin, 4 myńǵa jýyǵy – meditsinalyq-áleýmettik mekemelerde, 16 myńǵa jýyǵy – birinshi toptaǵy múgedekterge kútim jasaý jónindegi járdemaqyny paidalanady. Biraq zańnama bul járdemaqyny bala kezinen múgedek bolǵan jaǵdaida ǵana engizedi, al eresek adam múgedek bolsa she? Sondyqtan muny túbegeili ózgertkimiz keledi jáne barlyǵyna birinshi toptaǵy múgedekterge kútim jasaý boiynsha biryńǵai járdemaqy engizgimiz keledi», - dep túsindirdi Birjan Nurymbetov.
