Búgin «Qazmedia» ortalyǵynda Aýyl sharýashylyǵy ministri Saparhan Omarov esep berý kezdesýin ótkizip, vedomstvonyń 2018 jylǵy jumysyn qorytyndylady, dep habarlaidy Baq.kz agenttigi.
«2018 jyldyń ózinde maily daqyldardyń jalpy jinalymy 2,7 mln tonnany qurady. Qazaqstan zyǵyr óndirý kólemin 930 myń tonnaǵa deiin jetkizip, bul óndiris túri boiynsha álemde 1-orynǵa shyqty. Kartop óndirý kólemi 3,5 mln tonnadan 3,8 mln tonnaǵa, kókónis óndirý 3,8 mln tonnadan 4,1 mln tonnaǵa deiin ulǵaidy. Eksport ta qarqyndy damýda. Máselen, arpa eksporty 2 esege, raps maiy men qyzanaq 1,4 esege, soia 2 esege ósti», - dep aitty ministr.
Vedomstvo basshysy dándi daqyldardyń 20,3 mln tonna kólemindegi jinalǵan túsiminen undy esepke alǵanda 11,7 mln tonna astyq eksporttalǵanyn atap ótti.
«Mineraldy tyńaitqysh qoldaný qajettiliktiń 18% jetti, ótken jyldary bul kórsetkish 10-14% aspaityn. Byltyr tyńaitqyshtardy sýbsidiialaý protsesi tolyqtai avtomattandyryldy, al bólinetin qarajat kólemi 24% ulǵaidy. Qarqyndy baq sharýashylyǵyn damytý maqsatynda ótken jyly 1 132 ga, onyń ishinde Almaty oblysynda 432 gektar, Jambyl oblysynda 200 ga Túrkistan oblysynda 500 g qarqyndy baq otyrǵyzyldy», - dedi ol.
Ministr qabyldanǵan sharalar nátijesinde 2018 jyldyń qorytyndysy boiynsha jalpy ósimdik sharýashylyǵy ónimderin shyǵarý kólemi 3,2% ulǵaiyp, 2,4 trln teńgeni quraǵanyn aitty.
