Keshe elordadaǵy «SOS Astana balalar aýyly» memlekettik emes bilim berý mekemesinde «Qazaqstan Respýblikasyndaǵy balalardyń quqyqtaryn qorǵaý salasyndaǵy memlekettik organdar men úkimettik emes uiymdardyń ózara tiimdi árekettesý tetikteri» taqyrybynda dóńgelek ústel ótti.
Parlament Májilisiniń Áleýmettik-mádeni damý komiteti jáne «SOS Qazaqstannyń balalar aýyly» korporativtik qory birlesip uiymdastyrǵan basqosýǵa depýtattar, atalǵan qor basshylyǵy, Prezident janyndaǵy Áielder isteri jáne otbasylyq-demografiialyq saiasat jónindegi ulttyq komissiia músheleri, kásipkerler, memlekettik organdar men úkimettik emes uiymdardyń, sondai-aq, balalardyń quqyqtaryn qorǵaý salasynyń ókilderi qatysty.
Jiyndy ashqan «SOS Qazaqstannyń balalar aýyly» korporativtik qory qamqorshylar keńesiniń tóraǵasy, Májilis depýtaty Serik Seidýmanov bul basqosýdyń mańyzdylyǵyn aita kelip, elimizde balalar quqyǵyn qorǵaý boiynsha kóptegen jumystar atqarylyp jatqanyn, ásirese, jetim balalarǵa qamqor bolý isi basty nazarda turǵanyn sóz etti.
Odan ári depýtat jetim balalarǵa qoldaý kórsetý baǵytynda tiisti sharalardy júzege asyrý jalǵasa beretinin jetkizdi.
– Biz aldaǵy úsh jyldyq biýdjetke ózgerister men tolyqtyrýlar engizý týraly zań jobasyn talqylaý barysynda áleýmettik jetimderge jáne olardyń balalyq shaǵyn jaily ótkizýlerin qoldaý maqsatynda 1 milliard teńge bólýdi qarastyrdyq. Bul biýdjet Parlament Senatyna joldandy. Senat depýtattary bizdiń usynysymyzben kelisedi dep oilaimyz, – dedi S.Seidýmanov.
Budan keiin sóz alǵan «SOS Qazaqstannyń balalar aýyly» korporativtik qorynyń direktory Janargúl Qusmanǵalieva ózi basshylyq jasaityn qordyń jumysy jóninde áńgimelep berdi. Onyń aitýynsha, qazirgi tańda elimiz boiynsha qyzmet kórsetip otyrǵan Astana, Almaty jáne Temirtaý qalalaryndaǵy SOS balalar aýyldaryndaǵy 34 otbasynda 340 bala turaqty túrde tárbielenýde. Bul aýyldarda tárbielenip shyqqandardyń 165-i joǵary jáne kásibi bilim alǵan. Sonymen qatar, sońǵy 3 jylda osy aýyldardyń 127 túlegine memlekettik turǵyn úi qorynan páter berilgen.
Basqosýda jetim balalardyń quqyqtaryn qorǵaýdy júzege asyrýdaǵy memlekettik organdar men qoǵamdyq birlestikterdiń qyzmeti, taǵdyrdyń jazýymen ata-ana qamqorlyǵynan aiyrylǵan jetkinshekterdi qoldaý isinde memlekettik jáne úkimettik emes uiymdardyń yntymaqtasa jumys isteý joldary da talqylandy. Budan bólek, jiyn barysynda SOS balalar aýylynyń jumysyn Qazaqstan aýmaǵynda taratý jaiy, sondai-aq, bul jumysqa úkimettik emes uiymdardy tartý maqsatynda zańnamalyq máselelerdi sheshý týraly sóz boldy.
Sondai-aq, is-shara barysynda dóńgelek ústelge qatysýshylar «SOS Astana balalar aýyly» tárbielenýshileriniń turmystyq jaǵdailarymen tanysty.
Aita keteiik, mundai tiptegi balalar úiin alǵash ret 1949 jyly Avstriianyń Imst qalasynda dáriger German Gmainer degen azamat ashqan eken. Qazirgi tańda mundai balalar úii álemniń 135 elinde jumys istep jatqan kórinedi. Bul mekemeler «SOS Kinderdorf International» halyqaralyq qory aiasynda qyzmet kórsetýde. Qazaqstanda Sara Nazarbaevanyń bastamasymen alǵash ret 1994 jyly «SOS Qazaqstannyń balalar aýyly» qory qurylyp, ol SOS Kinderdorf International halyqaralyq qoryna múshe bolý sertifikatyn aldy. Al 1995 jyly Qazaqstan Respýblikasy Úkimetiniń jáne atalǵan halyqaralyq qordyń arasynda kelisim jasaldy. Sodan keiin, iaǵni, 1997 jyly Almatyda, 2000 jyly Astanada, 2004 jyly Temirtaýda SOS balalar aýyly quryldy.
Joldybai BAZAR,
«Egemen Qazaqstan»
.jpeg)