Foto: sk.kz
Qazaqstannyń soltústik jáne shyǵys aimaqtaryna tartylýy múmkin Resei gazynyń baǵasy eýropalyq naryqtaǵydan birneshe ese tómen bolady, tipti Belarýs úshin belgilengen baǵadan da arzan bolýy múmkin, dep málimdedi Qazaqstannyń energetika ministri Almasadam Sátqaliev. Bul týraly Sputnik Qazaqstan habarlady.
"Olar (reseilik jabdyqtaýshylar) bizge gazdy, aitalyq, Belarýske qaraǵanda áldeqaida tómen baǵamen beredi. Aldyn ala kelissózder júrgizilip jatyr. Iaǵni, tiimdi jumys ekijaqty rejimde ǵana bolatynyn Resei de túsinedi. Árine, bul eýropalyq baǵadan birneshe ese jáne Resei-Belarýs shekarasyndaǵy baǵadan áldeqaida tómen bolady", - dedi Sátqaliev Úkimet kýlýarynda.
Onyń aitýynsha, vedomstvo "Gazprommen" kelissóz júrgizip jatyr. Ministr áńgime Qazaqstannyń qajettiligin óteý úshin gaz qubyryn tartý týraly bolyp jatqanyn naqtylap ótti, sonymen qatar Qytaiǵa da qubyr tartý múmkindigi bar ekenine toqtaldy.
Eske salaiyq, buǵan deiin eks-energetika ministri Bolat Aqsholaqov Qazaqstan "Saryarqa" gaz qubyrynyń ekinshi jáne úshinshi kezeńiniń qurylysyn bastaýdy qarastyryp jatqanyn aitqan bolatyn.
