"Qazaqstan" ulttyq arnasynyń direktory aýysty

"Qazaqstan" RTRK" AQ  júiesinde birqatar kadrlyq ózgerister boldy, - dep habarlaidy "Ult aqparat" telearnanyń saityna silteme jasap.

Áshimov Asqar Turǵanbaiuly "Qazaqstan" Ulttyq telearnasynyń direktory bolyp taǵaiyndaldy. Ol ár jyldary "Qazaqstan" RTRK" AQ Atyraý oblystyq filialynyń direktory, "Qazaqstan" Ulttyq telearnasynyń bas rejisseri qyzmetterin atqarǵan.

Sondai-aq, "Qazaqstan" RTRK" AQ-nyń Aimaqtyq damý direktsiiasynyń direktory taǵaiyndaldy. Bul laýazymǵa buryn "Qazaqstan" RTRK" AQ Shyǵys Qazaqstan jáne Aqmola oblystyq filialdarynyń direktory qyzmetinde bolǵan Dúisenov Arsenii Keńesuly bekitildi.

"Qazaqstan" Ulttyq telearnasynyń direktory qyzmetin osy ýaqytqa deiin atqarǵan  Aǵybaev Janahmet Jánibekuly Atyraý oblystyq filialynyń direktory qyzmetine taǵaiyndaldy. 

"2017 jyldyń 24 aqpanyndaǵy "Qazaqstan" RTRK" AQ Direktorler Keńesiniń sheshimimen Mádi Manatbek "Respýblikalyq radio" JShS-niń Bas direktory bolyp taǵaiyndaldy", - delingen habarlamada.

Mádi Manatbek 2012-2013 jyldary "Qazaqstan" RTRK" AQ óndiris jónindegi basqarma tóraǵasynyń orynbasary qyzmetin atqarǵan. "Respýblikalyq radio" JShS "Qazaqstan" RTRK" AQ-nan qurylǵan radio habarlaryn taratý boiynsha jumys atqaratyn kásiporyn jáne onyń quramyna Qazaq radiosy, "Shalqar", "Astana", "Classic"  atty tórt radioarna kiredi.

Sonymen birge, Qoǵamnyń aimaqtardyń damýy jónindegi Basqarma tóraǵasynyń orynbasary Ysqaqov Ilias Basharulynyń jáne osy ýaqytqa deiin "Respýblikalyq radio" JShS Bas direktory qyzmetin atqarǵan Óteǵaliev Dosymbek Qonysbekulynyń  ókilettikteri toqtatyldy.