«Qazaqstan» ulttyq telearnasy kóktemgi jańarý maýsymynda kórermenderge tyń jáne jańa jobalar, onyń ishinde aqparattyq-saraptamalyq, oiyn-saýyqtyq baǵdarlamalar men otandyq tól telehikaialar usynady, dep habarlaidy atalǵan telearnanyń baspasóz qyzmeti.
Tańǵy «Tańsholpan» baǵdarlamasy búgin jańa formatta jańa júrgizýshilermen efirge shyqty. Endi tańǵy efir burynǵydan da kóńildi ári tanymdy bolmaq. Tańǵy baǵdarlamanyń jańa júrgizýshileri - Daniiar Esen, Baian Baqkeldi, Irina Ten jáne Dáýlet Bijanov.
Búginnen bastap «Qazaqstan» Ulttyq telearnasyndaǵy jańalyqtar jańa formatta ári «Basty aqparat» degen jańa ataýmen efirge shyǵady. Jańalyqtar legi ózgerip, elimizde jáne álemde bolyp jatqan ózekti jańalyqtardy obektivti túrde berýge aktsent qosady. Elimizdiń basty jańalyqtaryn tanymal jýrnalister Qymbat Dosjan men Daniiar Meńlibekov júrgizetin bolady. Aqparattyq-saraptamalyq blok «Basty taqyryp» atty kúndelikti jobamen tolyǵady. Joba avtorlary habar barysynda kúnniń negizgi jańalyqtaryn egjei-tegjeili qarastyrady. Baǵdarlamany Meiirjan Álibek júrgizedi.
Al, áleýmettik-saraptamalyq «Másele» baǵdarlamasynyń jýrnalisteri óz zertteýlerin júrgizip, stýdiia qonaqtarymen birge elimizdegi jáne shet memleketterde bolyp jatqan iri oqiǵalarǵa saraptama jasaidy. Baǵdarlama tizginshisi Nartai Aralbaiuly ózekti máselelerdi qarastyryp, qoǵamda oryn alyp otyrǵan áleýmettik-ekonomikalyq problemalardy sheshý joldaryn izdeidi.
25 naýryzdan bastap senbiniń keshinde jańa mýzykalyq «Án salady mamandar» jobasy efirge shyǵady. Atalmysh jobanyń ereksheligi, jobaǵa qatysýshylardyń mýzykaǵa esh qatysy joq, olar ár salanyń mamandary. Alaida, qatysýshylardyń barlyǵy án salǵandy unatady, ári mýzykaǵa beiim. Joba barysynda qatysýshylar án salýdan saiysqa túsip, óz mamandyqtarynyń ereksheligimen de bólisip otyrady.
20 naýryzdan bastap, balalardyń demalysy kezinde telearnanyń kishkentai kórermenderine arnalǵan «Disnei» kompaniiasynyń úzdik animatsiialyq filmderi qazaq tilinde sóileidi. Aita ketý kerek, barlyq mýltfilmder «Qazaqstan» telearnasynyń kómegimen sońǵy tehnologiialardy qoldana otyryp dybystalǵan. Alǵash ret halyqtyń súiiktisine ainalǵan mýltfilm keiipkerleri túrli daýysta qazaqsha sóilemek. Sebebi, dybystaýǵa 10-ǵa tarta dýbliaj akterleri tartylǵan. Mýltfilmderdegi mýzykalyq bezendirý orkestrmen súiemeldengen, al, ánderdi dýbliaj akterleri oryndaidy.
Senbi kúnderi telearna efirinde jekemenshik kinostýdiialar túsirgen otandyq zamanaýi kórkem filmder legi kórsetiletin bolady. Búgingi tańda otandyq kinoóndiris qarqyndy damyp keledi. Jyl ótken saiyn prokatqa shyqqan qazaqstandyq filmder sany artýda. Bul filmder kórermen arasynda keń tanymaldylyqqa ie bolýda. Oǵan halyqqa toly kinoteatrlar dálel. Mundai kórsetilim otandyq kinotýyndylardy qoldaý, ózimizdiń zamanaýi filmderimizdi kórýge jol ashady.
«Qazaqstan» telearnasy birneshe jyl kóleminde tól telehikaialaryn túsirýmen ainalysyp keledi.
27 naýryzda «Kózaiym» telehikaiasy efirge jol tartady. Hikaianyń maqsaty - eki otbasy arasynda órbitin oqiǵalar negizinde óskeleń urpaqtyń tárbiesine qatysty mańyzdy suraqtardy qozǵai otyryp, eldiń ekonomikalyq ósimin, mádeni, áleýmettik jetistikterin nasihattaý.
2017 jyly praim-taim ýaqytta otandyq telehikaialarǵa arnalǵan jeke ýaqyt bólinbek.
Ár senbi saiyn telearna efirinde álemniń úzdik óndirýshileriniń qolynan shyqqan kórkem filmder kórsetiledi. Senbilik keshti komediia, fentezi, blokbaster, melodrama syndy janrlardaǵy otbasylyq filmder quraidy.
Túngi efirdi tanymal rejisserlerdiń kartinalary, klassika jáne zamanaýi bestsellerler, álemdik kinematograftyń shedevrleri toltyrady.
18 naýryzdan bastap sońǵy jyldardaǵy eń úzdik britandyq serial Benedikt Kamberbetch basty róldi somdaǵan «Sherlok» týyndysy efirge shyǵady. Bul týyndy qazaq tilindegi sýbtitrlermen aǵylshyn tilinde kórsetiletin bolady. Túpnusqa negizinde kórsetý - kórermenderge súiikti akterleriniń shynaiy daýysyn estýge, sondai-aq, filmniń atmosferasyna túbegeili enip, aǵylshyn tilin úiden shyqpai-aq úirenýge múmkindik beredi.
22 naýryzdan bastap «Teń múmkindikter ýaqyty» atty derekti telejýrnal efirge shyǵady. Baǵdarlama qazaqstandyq biznestiń úzdik jobalary men success story týrasynda áńgime órbitedi.
Sonymen qatar, jańa sait boiynsha jumystar júrgizilýde. Sait jańa dizainmen erekshelenip, paidalanýshylarǵa barynsha túsinikti, ári jarqyn tústerge toly bolmaq.
