Qazaqstan, Túrikmenstan jáne Ózbekstannyń syrtqy ister ministrleri úsh memlekettiń shekaralarynyń túiisý núktesi týraly kelisimshartqa qol qoidy, dep habarlaidy «QazAqparat» HAA Ózbekstandaǵy menshikti tilshisi.
Oǵan QR Syrtqy ister ministri Qairat Abdrahmanov, ministrler kabineti tóraǵasynyń orynbasary - Túrikmenstan syrtqy ister ministri Rashid Meredov jáne Ózbekstan syrtqy ister ministri Abdýlaziz Kamilov qatysty.
Túiisý núkteleri týraly kelisimshartqa qol qoiý Qazaqstan, Túrikmenstan jáne Ózbekstan arasyndaǵy memlekettik shekaranyń halyqaralyq-quqyqtyq rásimdeý kezeńderiniń birin tolyqtai aiaqtaýǵa, ózara syilastyqty, egemendik teńdikti jáne úsh shekaralas memlekettiń territoriialyq tutastyǵyn nyǵaitýǵa myqty tireý bolady.
«Qazaqstan Prezidenti Nursultan Nazarbaev táýelsizdik alǵan alǵashqy kúnnen bastap memlekettik shekarany bekitý máselesine basa nazar aýdardy. Bul jaýapty memlekettik qurylystyń jáne el qaýipsizdigi máselesi. Búgin qol qoiylǵan úshjaqty kelisim úsh memlkettiń shekarasyn quqyqtyq rásimdeýge núkte qoiatyndyqtan, Ortalyq Aziia úshin tarihi jaǵdai», - dedi Qazaqstan syrtqy ister ministri Qairat Abdrahmanov qol qoiý rásiminen keiin.
