Atmosferalyq aýanyń aǵymdaǵy jaǵdaiy týraly aqparat endi Pavlodar, Ekibastuz, Petropavl jáne Aqtaý qalalarynda Led-ekrannan kórsetiletin bolady.
Bul týraly Ekologiia, geologiia jáne tabiǵi resýrstar ministrligi Facebook paraqshasynda jariialady.
«Transliatsiialaý úshin málimetter «Qazgidromet» RMK aimaqtyq filialdarymen «AirKz» mobildi qosymshasynyń kómegimen usynylyp, ár úsh saǵat saiyn jańartylyp otyrady. Bul joba «Qazgidromet» RMK, oblystyq ákimdikter men Led-ekrandary bar jekemenshik uiymdardyń qatysýy arqyly múmkin boldy. Pavlodar qalasynda aqparat Sátpaev/Krivenko, Sátpaev/Toraiǵyrov, Kýtýzov/Estai kósheleriniń qiylysynda, TJ vokzaly ǵimaratynyń ishinde, Ekibastuz qalasynda Lenina kóshesinde, Aqtaý qalasynda 4 jáne 14 shaǵyn aýdandaryndaǵy ekrandarda, Petropavl qalasynda oqýshylar saraiynyń ekranynda transliatsiialanady», - delingen habarlamada.
Al kelesi aida atmosferalyq aýanyń jai-kúii týraly aqparatty Aqmola, Qostanai, Batys Qazaqstan, Shyǵys Qazaqstan, Almaty jáne Jambyl oblystarynyń Led-ekrandarynda shyǵarý josparlanyp otyr. 2020 jyly aýa sapasy týraly málimetterdi Aqtóbe, Atyraý, Qaraǵandy jáne Qyzylorda oblystary menq Nur-Sultan, Almaty, Shymkent qalalarynda ekranǵa shyǵarý kózdelgen.
