Beijińde Qazaqstan komandasy tý ustaýshylarynyń kiimi Olimpiada oiyndary tarihyndaǵy úzdik kostiým dep tanyldy. Bul týraly Beijińdegi Olimpiada oiyndarynyń qorytyndysy boiynsha baspasóz máslihatynda Ulttyq Olimpiada komitetiniń bas hatshysy Andrei Kriýkov aitty, dep habarlaidy QazAqparat.
«Tý ustaýshynyń kiimi Olimpiada oiyndarynyń tarihynda úzdik dep tanyldy. Biz ony sáýir aiyndaǵy resmi rásim kezinde Olimpiada mýzeiine tapsyramyz», - dedi Kriýkov Ortalyq kommýnikatsiialar qyzmetinde.
Osy oraida Lozannadaǵy mýzei qonaqtary Qazaqstan sportshylarynyń kiim úlgisin tamashalai alady.
Qysqy Aq Olimpiada oiyndarynyń ashylý saltanatynda Qazaqstan komandasynyń tý ustaýshylary, konkishi Ekaterina Aidova men short-trekshi Abzal Ájiǵaliev tarihi obrazdaǵy kiimmen shyqty.
Olar saq patshaiymy Tomiris pen qazaq batyrynyń keipinde el aldyna shyqty. Komandanyń tý ustaýshylary kietin kiimde negizinen qazaqtyń ulttyq oiý-órnegi «qoshqar múiiz» beinelengen. Aita ketelik, órnek elementterin dizainerler Ábilhan Qasteev atyndaǵy memlekettik óner murajaiymen birlesip daiyndady. Tokio-2020 Olimpiadasynda da osyndai qadam jasalǵan bolatyn.
