Qazaqstan Táýelsiz Memleketter Dostastyǵyna tóraǵalyq etý estafetasyn resmi túrde Qyrǵyzstanǵa berdi, - dep habarlaidy Tengrinews.kz agenttigi.
Premer-ministr Álihan Smaiylov Astanada ótip jatqan TMD elderi Úkimet basshylary keńesiniń otyrysynda Qazaqstannyń 2022 jyly Táýelsiz Memleketter Dostastyǵyna tóraǵalyq etýi aiasynda josparlanǵan barlyq is-sharalar tolyq kólemde oryndalǵanyn aitty.
"Biyl Qazaqstan Táýelsiz Memleketter Dostastyǵyna tóraǵalyq etti. Tóraǵalyǵymyzdyń aiasynda barlyq salalardaǵy yntymaqtastyqty tereńdetý boiynsha jumystar júrgizildi. Jaqynda ótken Astana Sammitinde Dostastyqqa tóraǵalyq Qyrǵyzstan Respýblikasyna ótti. Osyǵan bailanysty qyrǵyz dostarymdy osy mańyzdy jáne qurmetti missiiamen quttyqtaǵym keledi", - dedi Qazaqstan Úkimetiniń basshysy.
Premer-ministr TMD keńistiginde ekonomikalyq turaqtylyqty qamtamasyz etý jónindegi sharalardy iske asyrý maqsatynda týyndaǵan problemalarǵa áreket etý boiynsha birlesken sharalar tizbesi qabyldandy.
"Qujat ózara investitsiialardy yntalandyrý, ónerkásiptik kooperatsiia, kedendik retteýdi jeńildetý, jańa logistikalyq tizbekterdi, terminaldyq infraqurylymdy qalyptastyrý, tsifrlyq tehnologiialardy engizý boiynsha yntymaqtastyqty tereńdetýdi kózdeidi", - dedi Álihan Smaiylov TMD otyrysy barysynda.
