Prezidenttiń tóraǵalyǵymen elimizdiń kólik-tranzittik áleýetin damytý jóninde keńes ótti. Jiynǵa Úkimet basshylyǵy, salalyq ministrlikter men vedomstvolardyń, ulttyq kompaniialardyń basshylary qatysty, dep habarlaidy "Ult aqparat" Aqordaǵa silteme jasap.
Qasym-Jomart Toqaev kólik-logistika salasynyń Qazaqstan ekonomikasynda erekshe ról atqaratynyn atap ótti. Onyń aitýynsha, óńirlerdiń ózara qarym-qatynasyn jandandyrý úshin bul salanyń mańyzy zor. Degenmen, geosaiasi jaǵdai men sanktsiialyq teketires dástúrli kólik-logistika jelisin ózgeriske ushyratty.
Jiyn barysynda qarym-qatynastar men júk jetkizetin balama baǵyttardy, sondai-aq tasymaldaý isin ártaraptandyrýdy pysyqtaý qajettigi aityldy.
Prezidenttiń pikirinshe, otandyq ónimniń eksportqa qaýipsiz ári úzdiksiz shyǵarylýyn qamtamasyz etý úshin keshendi sharalar qabyldaý qajet. Memleket basshysy elimizdiń Ortalyq Aziia aimaǵyndaǵy kóshbasshylyǵyn saqtap, Qazaqstandy senimdi tranzittik hab retinde damytý kerek ekenin aitty. Osy maqsatta balama temirjol baǵyttaryn qalyptastyrý qajet. Bul jerde Dostyq – Moiynty, Baqty – Aiagóz, Maqtaaral – Darbaza jobalaryn júzege asyrý, Almaty qalasyn ainalyp ótetin temirjol jelisin salý jóninde sóz bolyp otyr.
Qasym-Jomart Toqaev temirjol parkiniń jumysyn jandandyrý jáne joldarǵa kúrdeli jóndeý júrgizý jóninde sharalar qabyldaýdy tapsyrdy.
– Otandyq temirjol salasynda mashina jasaý isin damytýǵa basa mán berý qajet. Onyń alǵysharttary bar. Qazaqstandyq óndirýshilerdi belsendi túrde qoldaý kerek, – dedi Memleket basshysy.
Qasym-Jomart Toqaev «Qazaqstan temir joly» ulttyq kompaniiasyn tolyqtai jańǵyrtý qajet dep esepteidi.
– «Qazaqstan temir jolyn» ulttyq kólik-logistika kompaniiasy retinde transformatsiialaityn ýaqyt keldi dep oilaimyn. Bul QTJ-nyń mandaty men mindetterin keńeitýge, kompaniiaǵa elimizdiń kólik-tranzit áleýetin damytý jumystaryn keshendi túrde júrgizýge múmkindik beredi, – dedi Prezident.
Prezident teńiz arqyly tasymaldaý isin damytýǵa erekshe nazar aýdardy.
– Qazaqstan teńiz arqyly tasymaldaý áleýetin tolyq paidalanǵan emes. Qazir zaman basqa. Úkimetke porttarymyzdy Kaspii teńiziniń jetekshi habtarynyń birine ainaldyra otyryp, transformatsiialaý jóninde strategiialyq mindet júktedim. Teńiz flotyn nyǵaityp, Aqtaý portynda konteinerlik hab qurý qajet degen usynyspen tolyq kelisemin, – dedi Memleket basshysy.
Qasym-Jomart Toqaev munai tasymaldaý isin ártaraptandyrýdy taǵy bir mańyzdy mindet retinde atap ótti.
– Transkaspii baǵdary basym baǵyt sanalady. «QazMunaiGazǵa» ony júzege asyrýdyń ońtaily nusqasyn, sonyń ishinde Teńiz jobasynyń investorlaryn tartý múmkindigin pysyqtaýdy tapsyramyn. Úkimet «Samuryq-Qazynamen» birlesip, Atyraý – Keńqiiaq jáne Keńqiiaq – Qumkól munai qubyrlarynyń qýatyn arttyrý jóninde sharalar qabyldaýy qajet, – dedi Prezident.
Avtojol infraqurylymyn damytý máselesi de mańyzdy salalardyń biri. Memleket basshysynyń aitýynsha, eń aldymen, qurylysy bastalǵan magistraldy baǵyttardaǵy (Aqtóbe – Qandyaǵash – Maqat, Atyraý – Astrahan, Almaty – Qaraǵandy jáne Taldyqorǵan – Óskemen) qaita jańartý jumystaryn ýaqytyly ári sapaly aiaqtaý qajet.
Sonymen qatar Prezident biýdjet qarajatyn tiimdi paidalaný jáne otandyq kompaniialardy keńinen tartý qajet ekenine nazar aýdardy.
– Jobalardy júzege asyrý barysynda biýdjetti barynsha tiimdi paidalaný jáne otandyq ónimderdiń kólemin arttyrý basty qaǵidat bolýy kerek, – dedi Memleket basshysy.
Budan bólek Úkimetke jyl sońyna deiin kedendik rásimdeý úderisin jáne shekaralyq baqylaýdy tolyq avtomattandyrý tapsyryldy.
Jiyn barysynda Indýstriia jáne infraqurylymdyq damý ministri Qaiyrbek Óskenbaev, Energetika ministri Bolat Aqsholaqov, «Qazaqstan temir joly» UK» AQ basqarma tóraǵasy Nurlan Saýranbaev baiandama jasady. Sondai-aq talqylaýǵa Premer-ministr Álihan Smaiylov, Premer-ministrdiń orynbasary – Qarjy ministri Erulan Jamaýbaev, «QazMunaiGaz» UK» AQ basqarma tóraǵasy Maǵzum Myrzaǵaliev qatysty.
