«Qazaqstan» ulttyq arnasynda teleserialdardy irikteýmen ainalysatyn Sarapshylar keńesi quryldy. Bul týraly teleradiokorporatsiia basshysy Erlan Qarin Feisbýktegi paraqshasynda jazdy, dep habarlaidy "Ult aqparat".
«Qazaqstan» teleradiokorporatsiiasy teleserialdardyń sapasyn arttyrý maqsatynda, korporatsiiaǵa kelip túsken jobalardy irikteitin Sarapshylar keńesin qurý jaily sheshim qabyldady. Jańa reglamentke sáikes baiqaý komissiiasynyń alǵashqy irikteýinen ótken jobalar Sarapshylar keńesiniń taldaýyna usynylatyn bolady. Sarapshylar keńesiniń quramyna elimizdiń tanymal qoǵam qairatkerleri, óner tanýshylar men belgili jýrnalister kirdi», - dep jazdy telearna basshysy.
Erlan Qarinniń habarlaýynsha, Sarapshylar keńesiniń quramyna belgili memleket jáne qoǵam qairatkeri Myrzatai Joldasbekov, «Aiqyn gazeti» JShS-nyń direktory ári bas redaktory Nurtóre Júsip, kinotanýshy Nazira Muqysheva, tarihshy Berik Ábdiǵali, QR Parlamenti Májilisiniń depýtaty Baqytbek Smaǵul, belgili jýrnalister Sáken Sybanbai men Tólegen Baitúkenov engen.
«Búgin Sarapshylar keńesiniń alǵashqy otyrysy ótti. Otyrys barysynda árbir joba muqiiat talqylanyp, keńes músheleri óz baǵasyn berip, usynystaryn aitty. Al kelesi kezeńde prodakshn kompaniialardyń ókilderi óz jobalaryn osy keńes músheleriniń aldynda qorǵaityn bolady», - dep jazdy Erlan Qarin.
