Foto: khovar.tj
Qazaqstanǵa resmi saparmen kelgen Tájikstan Respýblikasynyń Syrtqy ister ministri Sirodjiddin Mýhriddin eki el arasynda biyl qandai birlesken jobalar júzege asyrylatynyn aitty, dep habarlaidy Ult.kz inbusiness.kz-ke silteme jasap.
"Byltyr ótken joǵary deńgeidegi kelissózderdiń búgingi kúni naqty nátijeleri bar. Birinshi, Qazaqstan territoriiasynda kúnbaǵys dánin óńdep, kúnbaǵys maiyn shyǵaratyn kásiporyn salý máselesi qarastyrylyp jatyr. Bul ónim keiin Tájikstanǵa eksporttalatyn bolady. Ekinshi, Qazaqstannyń Freedom Bank-iniń Tájikstanda enshiles uiymynyń ashylýy. Úshinshi, Astana, Pavlodar, Shymkent, Kókshetaý, Qostanai qalalarynda tájik ónimderiniń iri kórmelerin ótkizý. Tórtinshi, Tájikstan territoriiasynda jemis-kókónis ónimderin eksportqa ázirleitin birlesken iri logistikalyq ortalyqtyń salynýy. Besinshi, tsifrlyq salada áriptestik ornatyldy. Atap aitqanda Qazaqstan usynǵan tsifrlyq júieni Tájikstannyń memlekettik organdarynyń veb-resýrstaryna engizý júrgizilip jatyr", - dedi ol.
Sondai-aq, Sirodjiddin Mýhriddin premer-ministrdiń orynbasary – Syrtqy ister ministri Murat Nurtileýmen kezdesýinde ekonomikalyq áriptestik jónindegi úkimetaralyq komissiia jumysyn talqylaǵanyn aitty.
"Investitsiialyq áriptestik máselesine asa mán berildi. Sonyń ishinde Tájikstanda ártúrli salada qyzmet etip jatqan 100-ge jýyq qazaqstandyq kompaniiaǵa qolǵabys jasaý máselesi talqylandy. Eki eldiń energetikalyq áriptestiginiń bolashaǵy zor ekenin atap óttik. Jýyq arada eki el úkimetteriniń arasynda elektr energiiasy jónindegi kelisimge qol qoiylatyny jaily kelistik. Bul qujat "Rogýn" GES-i óndiretin elektr energiiasyn Qazaqstanǵa jetkizý máselesin retteidi", - dedi ol.
