Búgin elimizde ulyq mereke - Qazaqstan Respýblikasynyń Táýelsizdik kúni.
1991 jyly 16 jeltoqsanda Qazaqstan táýelsiz el retindegi óziniń múlde jańa tarihyna qadam basty. Sol kúni Qazaqstan Respýblikasynyń Prezidenti N.Á.Nazarbaev «Qazaqstan Respýblikasynyń Memlekettik táýelsizdigi týraly» Konstitýtsiialyq Zańyna qol qoidy. Al bul zańnyń Joǵarǵy Keńeste talqylap, qabyldanýy da sol kezeń úshin úlken beles edi.
Táýelsizdik kúni - 1991 jylǵy jeltoqsannyń 16-synda Qazaqstan Respýblikasynyń Prezidenti N.Á.Nazarbaev qol qoiǵan «Qazaqstan Respýblikasynyń memlekettik táýelsizdigi týraly» jáne 2008 jylǵy 25 maýsymdaǵy jáne 2009 jylǵy 22 sáýirdegi zańdarmen ózgertýler engizilgen 2001 jylǵy jeltoqsannyń 13-inde «Qazaqstan Respýblikasyndaǵy merekeler týraly» Qazaqstan Respýblikasy zańdaryna sáikes atalyp ótedi.
Áitse de bul kúndi qatardaǵy merekelik data retinde qaraýǵa kelmes. Bul týraly Elbasy N.Nazarbaev: «Menińshe, Táýelsizdik kúni tek resmi bekitilgen merekelik data ǵana bolýǵa tiisti emes. Bul kúnniń odan anaǵurlym mańyzy úlken mazmuny bar. Ol táýelsizdik jolyndaǵy kúrestiń núktesin qoiýmen birge, onyń bastalǵan kúni de boldy. Búgin ár qazaqstandyq ony óziniń jeke táýelsizdigi men tabysty kúni esebinde merekelei alady» degen bolatyn.
Biyl Qazaqstan halqy san ǵasyrlar boiy babalar armandaǵan azattyqty alyp, ańsaǵanyna qol jetkizgen Táýelsizdik kúnin 27-i ret qarsy alyp otyr. Árine, tarih úshin bul tym qysqa, tipti qas qaǵym sát bolyp kórinýi de múmkin. Áitse de, osy jyldar ishinde táýelsiz memleket retinde tyndyrǵan ister de az emes. Óńirge ǵana emes, álemge tanyldyq. Dúniedegi kúlli eldermen bailanys ornatyp, terezemiz barsha memleketpen teńesti. Bul da sol Táýelsizdiktiń jemisi. Endeshe, egemen el atanǵan Qazaqstan úshin qandai da bolmasyn merekeniń, meiram men toidyń atasy - Táýelsizdik kúni ekendigi daýsyz ári bul solai bolýy da tiis.
.jpeg)