Qazaqstan sýarmaly sýdyń qajetti kólemin alý úshin Qyrǵyzstan, Ózbekstan, Tájikstan jáne Túrikmenstanmen jeke-jeke kelissóz júrgizýge májbúr. Bul týraly QR Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
«Ózbekstanǵa keletin bolsaq, sý sharýashylyǵy qatynastary Syrdariia ózeniniń basseini boiynsha júzege asyrylady jáne Qazaqstan, Qyrǵyzstan, Ózbekstan, Tájikstan jáne Túrikmenstan arasyndaǵy besjaqty kelisim aiasynda retteledi. Kelisim aiasynda Vedomstvoaralyq úilestirýshi sý sharýashylyǵy komissiiasy jumys isteidi. Syrdariia ózeniniń basseini boiynsha negizgi problema buryn Keńes zamanynda belgilengen sý resýrstaryn bólý tártibin buzý bolyp tabylady», - dedi ol Senat tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Onyń atap ótýinshe, Táýelsizdik alǵannan keiin elder táýelsiz sý sharýashylyǵy saiasatyn júrgizedi jáne kóptegen jaǵdailarda tómengi aǵys elderiniń múddeleri eskerýsiz júzege asyrylady.
«Óz kezeginde, Qazaqstan ózenderdiń tómengi aǵysynda ornalasqan el retinde vegetatsiia kezeńinde sýarmaly sýdyń tapshylyǵyn qatty sezinedi. Osyǵan bailanysty, sýarmaly sýdyń qajetti kólemin alý úshin biz taraptardyń árqaisysymen jeke kelissóz júrgizýge májbúrmiz. Aita ketý kerek, biyl Ózbekstan Respýblikasymen eleýli jumys júrgizildi. Osy jyldyń jaz aiynda problemalyq máselelerdiń barlyq spektrin qamtityn jáne olardyń sheshý merzimderin aiqyndaityn sý qatynastary salasyndaǵy yntymaqtastyq máseleleri jónindegi jol kartasyna qol qoiyldy. 1991 jyldan keiin salynǵan jáne qaita jańartylǵan sý sharýashylyǵy qurylystaryna birlesken tekserý júrgizildi. Sondai-aq, Transshekaralyq sý obektilerin birlesip basqarý, paidalaný jáne qorǵaý týraly kelisim jobasy talqylandy», - dedi Maǵzum Myrzaǵaliev.
Sondai-aq, ol transshekaralyq sý obektilerin birlesip basqarý, paidalaný jáne qorǵaý týraly kelisim jobasy talqylanǵanyn aitty.
«Bul buryn sý balansynda eskerilmegen sý qoimalaryn anyqtaý úshin jasaldy. Búgingi kúni kelisim jobasynyń mátini 80 paiyzǵa kelisildi. Kelissózder jalǵasýda. Bul bolashaqta Ózbekstan aýmaǵynda ornalasqan negizgi sý sharýashylyǵy ýchaskelerinde sý resýrstaryn bólýdiń ashyqtyǵyn qamtamasyz etýge múmkindik beredi», - dedi ministr.
