Qazaqstan Úkimeti Investitsiialyq saiasattyń jańa tujyrymdamasyn bekitti, dep habarlaidy Sputnik Qazaqstan.
Prezidenttiń tapsyrmasymen Investitsiialyq saiasattyń jańa tujyrymdamasy ázirlendi.
"Bul qujat el ekonomikasyna tartylatyn investitsiialardyń ósýine aitarlyqtai yqpal etedi. Jalpy, biz investitsiia ósiminiń pandemiiaǵa deiingi deńgeiine jettik. Biylǵy jyldyń 5 aiynda negizgi kapitalǵa salynǵan investitsiialar kólemi 2,5%-ke ósip, 4,1 trillion teńgeni qurady", - dedi Premer-ministr Smaiylov Úkimet otyrysynda.
Óńirler arasynda biyl Aqmola oblysy, Shymkent jáne Almaty qalalary negizgi kapitalǵa salynǵan investitsiia ósiminiń joǵary qarqynyn kórsetip otyr. Al Túrkistan jáne Qaraǵandy oblystarynda bul kórsetkish aitarlyqtai tómendep ketken.
2021 jyldyń qorytyndysy boiynsha Qazaqstanǵa tartylǵan tikelei sheteldik investitsiianyń jalpy kólemi aldyńǵy jylmen salystyrǵanda 38%-ke ósip, shamamen 24 milliard dollardy qurady.
"Qazaqstan – tikelei sheteldik investitsiia úshin tartymdy el jáne bul jaǵynan Ortalyq Aziia óńirinde kósh bastap tur. Qazirgi jaǵdaida biz osy pozitsiiany nyqtai túsip, sheteldik investitsiia úshin kúreste belsendi qimyldaýymyz kerek jáne investorlarǵa barynsha ońtaily jaǵdai jasaýymyz qajet", - dedi Úkimet basshysy.
Sondai-aq ekonomikanyń shikizattyq emes sektorlarynda investitsiialyq jobalardy qarjylandyrý kózderin keńeitý kerek.
Smaiylov búgin usynylyp otyrǵan Investitsiialyq saiasat tujyrymdamasy ekonomikany damytýdyń jáne halyqtyń ál-aýqatyn arttyrýdyń draiverine ainalatyn jańa investitsiialyq tsikldiń bastaýy bolýǵa tiis ekenin atap ótti.
"Tujyrymdamada 2026 jyly negizgi kapitalǵa investitsiia deńgeiin jalpy ishki ónimniń 25,1%-ne deiin jetkizýdi jáne tikelei sheteldik investitsiia kólemin 25,5 milliard dollarǵa deiin ulǵaitýdy kózdeitin aýqymdy maqsatty indikatorlar belgilengen", - dedi Premer.
Memlekettik investitsiialyq saiasat sapaly sheteldik jáne ishki investitsiiany tartýǵa, ekonomikalyq belsendilikti arttyrýǵa jáne halyqtyń tabysyn ulǵaitýǵa, onyń ishinde jańa turaqty jumys oryndaryn qurýǵa baǵyttalady.
Úkimet tujyrymdamany bekitti.
