Dárilik zattardy, meditsinalyq maqsattaǵy buiymdardy jáne meditsina tehnikasyn saraptaý ulttyq ortalyǵy bas direktory Arnur Nurtaev Qazaqstan shetelden satyp alatyn vaktsinalarǵa qandai talaptar qoiatynyn aityp berdi, - dep habarlaidy QazAqparat.
«Qazir qoǵamda vaktsinaǵa qatysty ártúrli pikir bar. Qarsy taraptardyń biri «men ekpege qarsy emespin, biraq olar sapaly bolýy kerek» degendi alǵa tartady. Búgin taǵy da Qazaqstanǵa qandai vaktsinalar ákelinetinin jáne qalai paidalanylatynyn aityp bereiin. Eń birinshi kezekte vaktsinalarǵa qoiylatyn talaptar: olar qaýipsiz ári qorǵanys immýnitetin kótere alatyndai, epidemiologiialyq turǵyda tiimdi bolýy kerek», - dedi Arnur Nurtaev Densaýlyq saqtaý ministrliginiń onlain baspasóz máslihatynda.
Arnur Nurtaev sheteldik vaktsinalarǵa qoiylatyn osy talaptar qalai qadaǵalanatynyn aityp berdi. Onyń aitýynsha qazirgi tańda memlekettik tizilimde 64 vaktsina tirkelgen. Aldyn alý ekpeleriniń ulttyq kúntizbesinde balalarǵa arnalǵan 11 vaktsina bar. Naqtyraq aitqanda balalarǵa týberkýlez, V gepatitti virýs, poliomielit, kókjótel, difteriia, sirespe, qyzylsha, qyzamyq, epidemiialyq parotit, gemofildi jáne pnevmokokk infektsiiasyna qarsy ekpe jasalady.
«Vaktsinanyń qaýipsizdigi men sapasyn bizdiń Dárilik zattardy, meditsinalyq maqsattaǵy buiymdardy jáne meditsina tehnikasyn saraptaý ulttyq ortalyǵy baǵalaidy. Vaktsinany memlekettik tirkeý kezinde, iaǵni naryqqa engizerde bir, tirkeýden ótkennen keiin taǵy bir tekseremiz. Bul rette tutas sarapshylar toby jumys júrgizedi. Sarapshylar toby alǵashqy kezeńdi óndiris sharttaryn baǵalaýdan bastaidy. Bul kezeńde ortalyq sarapshylary óndiris alańyna baryp, naqtylanǵan algoritm negizinde baǵalaý júrgizedi. Biz vaktsina ázirleitin kásiporynnyń ishki óndiristik qaýipsizdigin qaita tekseremiz. Ǵimarattyń talapqa sáikestigi tekseriledi. Eger bizdiń standarttarǵa sai kelmei qalsa óndirýshimen sol jerde-aq kelisim buzylady. Mundai kelisimdi qytailyq, úndistandyq, tipti eýropalyq áriptesterimizben de buzǵanbyz», - dedi ol.
Vaktsinany tekserýdiń ekinshi kezeńi – qujattar saraptamasy. Iaǵni qujattardyń báriniń de Qazaqstan Respýblikasynyń zańnamasyna sáikestigi tekseriledi.
«Biz áý bastan-aq eýropalyq tekserý standarttaryn tańdap alǵanbyz. Ol óte qatań. Ol erejelerdi óndirýshilerdiń kóbi jaqtyrmaidy. Sebebi bul standarttardyń ýaqyty tym uzaq. Alaida bul jerde másele azamattardyń densaýlyǵyna qatysty bolǵandyqtan biz álemniń úzdik standarttaryn tańdaǵan jón dep sheshtik. Úshinshi kezeń – mamandandyrylǵan (farmatsevtikalyq jáne farmakologiialyq dep ekige bólinetin) saraptama. Atalmysh kezeńde vaktsinanyń shynynda da densaýlyqqa qaýipsiz jáne tiimdi ekenin anyqtaimyz», - dedi ol.
Mamandandyrylǵan saraptamadan keiin vaktsinalar analitikalyq saraptamadan ótedi. Tórtinshi kezeńde vaktsinalarǵa qaýipsiz ekeni týraly qorytyndy berilse, besinshi kezeńde tirkeý kýáligi tapsyrylady. Altynshy kezeńde vaktsina tirkeýden ótkennen keiingi qadaǵalaýda bolady.
