Qazaqstan shekarasyn belgileýge atsalysqan tulǵalarǵa Atyraý, Oral, Shymkent, Almaty, Nur-Sultannan kóshe ataýyn berý kerek. Bul týraly «Aq jol» demokratiialyq partiiasy «Alash» institýtymen birge uiymdastyrǵan «Qazaq Respýblikasynyń 100 jyldyǵy jáne onyń qurylýyna «Alash» qairatkerleriniń úlesi» taqyrybynda ótken onlain konferentsiiada aityldy, dep habarlaidy QazAqparat.
Tarih ǵylymdarynyń doktory, professory Aqqali Ahmet Qazaqstan shekarasyn bekitýge atsalysqan málim, ári beimálim tulǵalar týraly aitty.
«Mustafa Kókebaevtyń Qazaq Respýblikasyn qurý jolyndaǵy eńbegi týraly Rahmet Imanǵaliev aǵamyzdyń jazǵan eńbegi bar. Ol 1964-1970 jyldary Mustafa Kókebaevtyń qasynda erip júrgen azamattardyń esteligin jazyp qalǵan. Mustafa Kókebaev 1920 jyly Jer komitetiniń tóraǵasy, gýberniialyq atqarý komitetiniń jaýapty hatshysy bolyp, jańadan irgetasy qalanyp jatqan Qazaq Respýblikasynyń jariialanýy úshin qyzmet atqarǵan. Barlyq qujattardy daiyndaý, málimetterdi qaǵaz betine túsirý Mustafa siiaqty eki tildi de birdei meńgergen saýatty adamǵa tapsyrylǵan», - deidi tarih ǵylymdarynyń doktory, professory Aqqali Ahmet.
Onyń aitýynsha, Qazaqstan shekarasyn belgileýdiń ózine tán erekshelikteri bolǵan.
«Shekaranyń mátindik sipattaýy, kartografiialyq materialdar is júzinde múldem bolǵan joq. 1920 jyly Qazaq Respýblikasy qurylǵan kezden bastap Qazaqstan men Resei shekarasy birinshi ret ózgeriske túskeni belgili. Mustafa Kókebaev sol kezde Qazaqstannyń batys shekarasynyń bir bóligin naqtylap, qai aýmaq bizdiń shekara aýmaǵyna kirý kerek ekenin túiemen júrip kartaǵa túsirtken. Ol eldiń shekarasyn belgileýge erekshe eńbegi sińgen azamat. Ol 1937 jyly Shymkentte pedagogikalyq insttitýtta sabaq bergen eken. Ulty úshin aianbai eńbek etken, Qazaqstan shekarasyn belgileýge atsalysqan tulǵaǵa Atyraý, Oral, Shymkent, Almaty, Nur-Sultannan bir kóshe ataýyn berse – eskerýsiz qalǵan tulǵany qurmettegenimiz bolǵan edi», - deidi ol.
Ol el shekarasyn bekitýde erekshe eńbegi sińgen taǵy bir tulǵa – Ýálihan Tanashev ekenin aitty.
«Ýálihan Tanashev týraly Qazaqstannyń ulttyq entsiklopediiasynda qysqasha ǵana málimet bar. Onyń týǵan jeri – qazirgi Atyraý oblysy, Qurmanǵazy aýdany, Maqash aýyly. Ol balyq óndirisi iesiniń otbasynda dúniege kelgen. Keiin onyń otbasynyń adal jolmen tapqan eńbegi kánpeskelenedi. Ýálihan Tanashev Qazaq Respýblikasyn qurýmen ainalysqan birden bir tulǵa. Ókinishke qarai, onyń atynda elimizde ne durys kóshe, ne eskertkish joq. Qazaq shekarasyn bekitýge úles qosqan tulǵalardy árdaiym nasihattaýymyz kerek», - deidi ol.
