Prezident Saýd Arabiiasynyń isker toptar ókilderimen ótken investitsiialyq dóńgelek ústelge qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysynyń Saýd Arabiiasyna resmi saparynyń ekinshi kúni eldiń isker toptar ókilderimen ótken investitsiialyq dóńgelek ústelge qatysýdan bastaldy.
Eki eldiń investitsiia, ekonomika, saýda jáne qarjy salalaryndaǵy yqpaldastyǵyn nyǵaitý kezdesýdiń negizgi taqyryby boldy.
Qasym-Jomart Toqaev jiynǵa qatysýshylarǵa iltipat bildire otyryp, Saýd Arabiiasynyń Taq murageri Muhammed ben Salman ben Ábdelaziz Ál Saýdpen ótkizgen keshegi kezdesýinde saýda-ekonomikalyq jáne investitsiialyq yntymaqtastyqty keńeitý jóninde mańyzdy ýaǵdalastyqtarǵa qol jetkizilgenin aitty.
Prezident memleketterimizdiń keleshek ekonomikalyq damýǵa degen kózqarastary uqsas ekenin atap ótti.
– «Saudi Vision-2030» baǵdarlamasy men bizdiń «Qazaqstan-2050» strategiiasy ekonomikany ártaraptandyrý, shikizatqa táýeldilikti tómendetý, adami kapitalǵa investitsiia salý, túptep kelgende, joǵary damyǵan elderdiń qataryna kirý arqyly ulttyq damýǵa qol jetkizýdi kózdeidi, – dedi Memleket basshysy.
Prezident Saýd kásipkerlerine Qazaqstannyń ekonomikalyq jetistikteri týraly málimet berdi.
– Táýelsizdik jyldary Qazaqstannyń ishki jalpy ónimi 17 ese ósti. Búginde Qazaqstan ekonomikasy Ortalyq Aziiadaǵy barlyq ózge elder ekonomikasynyń jiyntyq kóleminen asyp túsedi. Ortalyq Aziiadaǵy taýar ainalymynyń 60 paiyzǵa jýyǵy Qazaqstanǵa tiesili. Elimizdiń halyqaralyq rezervi – 90 milliard dollar jáne TMD boiynsha jan basyna shaqqanda eń joǵarysy sanalady. Sheteldik investorlar elimizdiń ekonomikasyna 380 milliard dollardan astam qarjy quidy. Bul Ortalyq Aziia aimaǵyna salynǵan jalpy investitsiianyń 70 paiyzyn quraidy, – dedi Qasym-Jomart Toqaev.
Memleket basshysy Qazaqstanda Saýd Arabiiasynyń qoldaýymen bilim berý, densaýlyq saqtaý, mádeniet jáne infraqurylym salalarynda quny 120 million dollardan asatyn birqatar mańyzdy joba júzege asyrylǵanyn jetkizdi. Qazaqstan Prezidentiniń pikirinshe, bul soma memleketterimizdiń áleýetine sai kelmeidi.
Osyǵan bailanysty Memleket basshysy yntymaqtastyqty keńeitýdiń meilinshe perspektivti salalaryn belgilep berdi. Eń aldymen, bul ekijaqty saýda-sattyqqa qatysty.
– Biz júrgizgen taldaýǵa sáikes Qazaqstan mashina jasaý, shoiyn jáne bolat óndirisi, sondai-aq tamaq ónerkásibi men aýyl sharýashylyǵy siiaqty salalar boiynsha quny shamamen jylyna 400 million dollar bolatyn shikizat taýarlarynyń 100-den astam túrin usyna alady, – dedi Prezident.
Qasym-Jomart Toqaev Qytai, Qazaqstan, Ázerbaijan, Grýziia jáne Túrkiia arasyn jalǵastyratyn kólik-tranzit jáne logistikalyq múmkindikterdi, sonyń ishinde Transkaspii baǵdaryn ártaraptandyrýdy jáne keńeitýdi ekinshi mańyzdy baǵyt retinde atap ótti.
Onyń pikirinshe, yntymaqtastyqtyń mol áleýetin ekonomikanyń naqty sektorynda da paidalanýǵa bolady.
– Qazaqstan álemde volfram qory boiynsha 1-oryn, ýran men hrom boiynsha 2-oryn alady, al marganets, kúmis, myrysh, qorǵasyn bailyǵy boiynsha alǵashqy bestikke kiredi. Bul qorlardy barlap, zertteý kerek. Qarqyndy damyp kele jatqan Qytai men Ońtústik Aziia naryǵyna jaqyndyǵymyzdy eskere otyryp, investitsiia salýǵa, shyn máninde, bul jaqsy múmkindik. Búgin biz barlaý jáne ázirleme jumystary úshin baǵaly jáne tústi metaldyń 60-tan astam ken ornyn usyna alamyz, – dedi Memleket basshysy.
Qazaqstan men Saýd Arabiiasynyń munai himiiasy, atom energetikasy, jasyl sýtegi óndirisi salalaryn damytý, ǵaryshty zertteý jóninde jáne basqa da baǵyttar boiynsha jospary bar.
– Biz Koroldiktiń Saudi Vision-2030 strategiiasy aiasynda óziniń ǵaryshtyq baǵdarlamasyn damytýǵa degen nietin qoldaimyz. Elderimizdiń ǵarysh keńistigin zertteý jáne beibit maqsatta paidalaný salasyndaǵy yntymaqtastyq úshin tiisti quqyqtyq bazasy bar. Qazaqstannyń aeroǵarysh salasyn damytý úshin tájiribesi de, áleýeti de jetkilikti. Bizdiń kompaniialarymyz osy salalar boiynsha Saýd Arabiiasynyń memlekettik jáne jeke kompaniialarymen ózara yntymaqtastyq ornatýǵa daiyn, – dedi Qasym-Jomart Toqaev.
Prezident otandyq agrosektordyń áleýetine de toqtaldy.
– Qazaqstan egistik kólemi boiynsha jan basyna shaqqanda álemde ekinshi, jaiylymdyq jerler jóninen besinshi oryn (180 million gektar) alady. Elimiz bidai ósiretin jáne un óndiretin 10 iri memlekettiń qataryna kiredi. Biz Koroldikke joǵary sapaly bidai, un jáne maily daqyldardy turaqty ári uzaq merzimdi jetkizýshi elderdiń biri bolýǵa daiynbyz, – dedi Qasym-Jomart Toqaev.
Týrizm salasynda da yqpaldastyq ornatýǵa zor múmkindikter ashylady. Atap aitqanda, Memleket basshysy Saýd kásipkerlerine Qazaqstannyń týristik-rekreatsiialyq jobalaryn qarastyryp kórýdi usyndy.
Sonymen qatar Qasym-Jomart Toqaev Qazaqstanda investorlar úshin zamanaýi institýtsionaldyq orta qalyptasqanyn eske saldy.
– Osy múmkindikti paidalana otyryp, Qazaqstannyń Saýd Arabiiasymen aradaǵy ekijaqty yntymaqtastyqty nyǵaitýǵa jáne keńeitýge beiildi ekenin rastaǵym keledi. Búgin osynda búkil álemde aitarlyqtai tabystarǵa qol jetkizgen Saýd Arabiiasynyń iri kompaniialarynyń basshylary qatysyp otyr. Men bárińizdi ózara tiimdi negizde Qazaqstanda birlese jumys isteýge shaqyramyn, – dedi Qazaqstan Prezidenti.
Dóńgelek ústel barysynda Saýd Arabiiasynyń Investitsiia ministri Halid Ál-Falih, «Samuryq-Qazyna» aktsionerlik qoǵamynyń basqarma tóraǵasy Almasadam Sátqaliev, UBH «Báiterek» aktsionerlik qoǵamynyń basqarma tóraǵasy Qanat Sharlapaev, «SABIC» kompaniiasy direktorlar keńesiniń tóraǵasy Halid Hashim ál-Dabbag, «MA'ADEN» kompaniiasynyń bas direktory Robert Ýilt, «ACWA Power» kompaniiasy direktorlar keńesiniń tóraǵasy Muhammed Abýnaiian sóz sóiledi.
Budan bólek forým jumysyna Ajlan & Bros Holding Group, SALIC, Saudi National Bank, Alhokair Group, FlyNas, Savola Group, SPIMACO, National Technology Group (NTG), Kingdom Holding, Dr. Sulaiman Al Habib Medical Group, Al Rajhi International for Investment, Al Muhaidib Group, Jamjoom Pharma, Tabuk Agriculture Development siiaqty iri kompaniialardyń basshylary, sondai-aq Saýd Arabiiasy ekonomikasynyń barlyq sektorynda jumys isteitin birneshe ondaǵan kompaniianyń jetekshileri qatysty.
Memleket basshysy Qasym-Jomart Toqaevtyń resmi sapary aiasynda mynadai qujattarǵa qol qoiyldy:
1. Qazaqstan Respýblikasy Mádeniet jáne sport ministrligi men Saýda Arabiiasynyń Sport ministrligi arasyndaǵy sport salasy boiynsha ózara túsinistik týraly memorandým.
2. Qazaqstan Respýblikasy Aqparat jáne qoǵamdyq damý ministrligi men Saýd Arabiiasy Buqaralyq aqparat quraldary ministrligi arasyndaǵy BAQ salasyndaǵy yntymaqtastyq jóninde ózara túsinistik týraly memorandým.
3. «Saýd baspa isi agenttigi» men «Qazaqstan Respýblikasy Prezidentiniń Teleradiokesheni» KeAQ arasyndaǵy ózara túsinistik jáne aqparat almasý týraly memorandým.
4. Astana International Exchange Ltd. kompaniiasy men Saýd qor birjasy (Tadawul) arasyndaǵy ózara túsinistik týraly memorandým.
5. Iri qara men qoi eti importyna qoiylatyn sanitarlyq-tehnikalyq hattama.
6. Qazaqstan Respýblikasy Energetika ministrligi men ACWA Power kompaniiasy arasyndaǵy ózara túsinistik týraly memorandým.
7. «Samuryq-Qazyna» AQ men Ajlan & Bros Holding Group Ability kompaniiasy arasyndaǵy yntymaqtastyq týraly kelisim.
8. «KAZBIOSORGO» JShS men Ajlan & Bros Holding Group kompaniiasy arasyndaǵy ózara túsinistik týraly memorandým.
9. «QazTrade» Saýda saiasatyn damytý ortalyǵy» AQ men Ajlan & Bros Holding Group Ability kompaniiasy arasyndaǵy yntymaqtastyq týraly kelisim.
10. «Optograd» JShS men Ajlan & Bros Holding Group Ability kompaniiasy arasyndaǵy Qazaqstannan Saýd Arabiiasyna et jetkizý jónindegi ózara túsinistik týraly memorandým.
11. «KAZAKH INVEST Ulttyq kompaniiasy» AQ men Al Rajhi International for Investment (RAII) kompaniiasy arasyndaǵy investitsiialar boiynsha yntymaqtastyq týraly memorandým.
12. «QazTrade» Saýda saiasatyn damytý ortalyǵy» AQ men «Lýlý Saýdi Gipermarkets» kompaniiasy arasyndaǵy yntymaqtastyq týraly memorandým.
13. «Eurasia Invest LTD» JShS men Jamjoom Pharma kompaniiasy arasyndaǵy Qazaqstannan Saýd Arabiiasyna qurǵaq qymyz jetkizý týraly kelisim.
