Qazaqstan Respýblikasynyń Syrtqy ister ministrligine Resei Federatsiiasynyń Ýaqytsha senimdi ókili Aleksandr Komarov shaqyryldy, dep habarlaidy "Ult aqparat" QR SIM resmi saityna silteme jasap.
Kezdesý barysynda Syrtqy ister ministriniń orynbasary Marat Syzdyqov Resei Federatsiiasy Memlekettik Dýmasynyń Bilim jáne ǵylym jónindegi komitetiniń tóraǵasy Viacheslav Nikonovtyń Birinshi arnadaǵy «Qazaqstan aýmaǵy - Resei tarapynan úlken syilyq» degen sózine qatysty túsinispeýshilik bildirdi.
Sondai-aq, keibir reseilik saiasatkerlerdiń Qazaqstanǵa qatysty arandatýshylyq áreketteriniń jiilep ketýi memleketterimiz arasyndaǵy odaqtastyq qatynastarǵa aitarlyqtai nuqsan keltiretini atap ótildi.
QR SIM resei tarapynyń mundai málimdemelerge tiisti baǵa berýin kútýde jáne Resei Federatsiiasynyń memleket qairatkerlerinen mundai málimdemelerge jol bermeý úshin sharalar qabyldaýǵa shaqyrady.
Reseilik diplomatqa QR SIM ustanymy kórsetilgen nota tabystaldy.
Eske salaiyq, buǵan deiin reseilik "Birinshi arna" efirinde Memlekettik Dýma depýtaty Viacheslav Nikonovtyń Qazaqstan týraly aitqan sózi jelide taraǵan edi. Depýtat efir barysynda Qazaqstan degen el bolmady degen edi.
"Qazaqstan bolǵan joq, Soltústik Qazaqstanda buryn múlde qonystanbaǵan. Olar bolǵan, biraq ońtústikke jaqyn. Shyn máninde, Qazaqstan territoriiasy - Resei men Keńes Odaǵynyń úlken syilyǵy", - degen edi Nikonov "Bolshaia igra" baǵdarlamasynda.
