Qazaqstan tarapy reseilik astyqtyń tranzitine tarifti kótergen joq. Bul týraly "Qazaqstan temir joly" (QTJ) Ulttyq kompaniiasy málimdedi.
Kompaniianyń baspasóz qyzmeti habarlaǵandai, Qazaqstan aýmaǵy boiynsha reseilik astyqty tranzittik tasymaldaýdyń tariftik sharttary sońǵy 4 jylda ózgermegen.
«Reseiden Qazaqstan aýmaǵy arqyly tranzitpen astyq tasymaldaý kólemi oń serpin kórsetip otyr. Máselen, 2022 jyldyń 10 aiynda tranzit kólemi 2021 jyldyń sáikes kezeńimen salystyrǵanda 24%-ǵa, iaǵni 301 myńnan 372 myńǵa deiin ósti», - dep málimdedi QTJ ókilderi.
Aita ketsek, buǵan deiin kórshi eldiń BAQ-tary «Qazaqstan tranzittik tarifti kúrt arttyryp, Ortalyq Aziia elderi men Qytaiǵa tasymaldanatyn astyq tranzitine is júzinde tosqaýyl qoiyp otyr, endi Qazaqstan arqyly astyqty tasymaldaý «ekonomikalyq maqsatqa sai emes» dep habarlaǵan bolatyn.
