Baiqońyr qalasynyń Resei Federatsiiasyna jalǵa berilgen aýmaqtarynda 1,9 mln tonna zańsyz qurylys qaldyqtary jatyr. Bul týraly Májilis depýtattarynyń saýalyna orai QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Baiqońyr» kesheniniń 5 alańynda (№9, 9G, 9TZB, 15G jáne 20) ruqsat etilmegen oryndarda ornalasqan qurylys jáne basqa da qaldyqtar Resei Federatsiiasyna jalǵa berilgen jer ýchaskelerinde ornalasqan. 2018 jyly múddeli memlekettik organdar qatarynan (QR EGTRM, Baiqońyr qalasynyń ákimshiligi, Resei federaldy biomeditsinalyq agenttigi) komissiia quryldy, ruqsat etilmegen qoqys oryndary men jer ýchaskelerin ornalastyrý shemasy jasaldy. Túziletin qaldyqtardyń oryndary, kólemi jáne olardyń morfologiialyq quramy anyqtaldy», - dedi Premer-Ministr.
Onyń aitýynsha, joǵaryda atalǵan komissiianyń jumysyn túgendeý aktisine sáikes Baiqońyr qalasynyń aýmaǵynda ruqsat etilmegen jerlerde ornalasqan qiraǵan ǵimarattar men qurylystardyń jáne basqa da qaldyqtardyń jalpy kólemi 1,9 mln. tonnany quraidy.
«Ekologiia, geologiia jáne tabiǵi resýrstar ministrligi Baiqońyr qalasy Ákimshiliginiń basshysyna qala aýmaǵyn Qazaqstan Respýblikasynyń ekologiialyq zańnamasynyń talaptaryna sáikes keltirý jóninde túbegeili sharalar qabyldaý týraly hat joldady. Qazirgi ýaqytta Ekologiia, geologiia jáne tabiǵi resýrstar ministrligi Qyzylorda oblysynyń ákimdigimen birlesip, Resei tarapymen osy máseleni pysyqtaýdy jalǵastyrýda», - dedi Asqar Mamin.
